एजेन्सी, २१ माघ । अमेरिकी राष्ट्रपति डोनाल्ड ट्रम्पले अमेरिकी अन्तर्राष्ट्रिय विकास नियोग (यूएसएआईडी) का दुई उच्च अधिकारीसहित धेरै कर्मचारीहरूलाई निलम्बन गरेका छन् ।

यूएसएआईडीका निर्देशक जोन वूर्हीज र उपनिर्देशक ब्रायन म्याकगिललगायत कर्मचारीहरूलाई निलम्बित गरिएको हो । निलम्बनको कारण गभर्मेन्ट एफिसिएन्सी डिपार्टमेन्ट र यूएसएआईडीका अधिकारीहरूबीच यूएसएआईडी सिस्टममा पहुँचको विवादलाई जनाइएको छ ।

इलन मस्कको नेतृत्वमा रहेको गभर्मेन्ट एफिसिएन्सी डिपार्टमेन्टले यूएसएआईडीको सिस्टममा पहुँचको लागि आग्रह गरेपछि विवाद उत्पन्न भएको हो । यूएसएआईडीका अधिकारीहरूले अनुमति नदिएपछि डिपार्टमेन्टका कर्मचारीहरूले जबरजस्ती यूएसएआईडीको मुख्यालयमा प्रवेश गर्न प्रयास गरेका थिए । यस क्रममा यूएसएआईडी अधिकारीहरूले सुरक्षा अधिकारीहरूलाई बोलाउने धम्की दिएपछि विवाद झनै बढेको थियो ।

डिपार्टमेन्टका केही कर्मचारीहरूले बिना अनुमति यूएसएआईडीको संवेदनशील स्थानहरूमा प्रवेश गरेको र नागरिकहरूको गोप्य सूचना संकलन गरेको आरोप सीएनएनले लगाएको छ । यद्यपि, गभर्मेन्ट एफिसिएन्सी डिपार्टमेन्टकी कर्मचारी कैटी मिलरले गोप्य सामग्रीमा बिना अनुमति पहुँच नगरिएको स्पष्ट पारेकी छन् ।

यसैबीच, इलन मस्कले एक्समा लेख्दै यूएसएआईडीलाई ‘आपराधिक संगठन’ भनी आलोचना गरेका छन् र अब यसलाई बन्द गर्नुपर्ने समय आएको बताएका छन् । मस्कको ट्वीटको केही समयपछि यूएसएआईडीको आधिकारिक वेबसाइट र सामाजिक सञ्जाल अकाउन्टहरू बन्द गरिएका छन् ।

राष्ट्रपति ट्रम्पले हालै शपथ लिएपछि विदेशमा जाने सबै प्रकारका सहायता ९० दिनका लागि रोक्ने आदेश जारी गरेका थिए । उनले यससम्बन्धी कार्यकारी आदेशमा हस्ताक्षर गरेर अमेरिकी संघीय अनुदान र ऋण सहायता रोक्ने निर्णय लिएका छन् ।

यूएसएआईडी विश्वभरिका करिब १०० देशहरूमा काम गर्दै आएको एक प्रमुख अमेरिकी सहायता संस्थान हो । यसले स्वास्थ्य, शिक्षा, आर्थिक विकास, लोकतन्त्र, सुशासन र विपद् व्यवस्थापनमा सहयोग पुर्याउने उद्देश्य राख्दै विभिन्न देशका सरकारी, गैरसरकारी र निजी संस्थाहरूसँग सहकार्य गरिरहेको छ । तर, ट्रम्पको नयाँ नीतिका कारण यूएसएआईडीको भविष्य अनिश्चित देखिएको छ ।