सुनसरी, माघ १९ । चुरे तथा वन जंगल संरक्षण अभियानले कोशी प्रदेशस्तरीय समिति गठन गरेको छ ।

शनिबार इटहरी उपमहानगरपालिका–६ मा आयोजित भेलाबाट प्रदेशस्तरीय समिति चयन गरिएको हो । यसले चुरे क्षेत्रको वनजंगल संरक्षण तथा वातावरणीय संरक्षणमा विशेष भूमिका निर्वाह गर्ने अपेक्षा गरिएको छ ।

प्रदेश समितिको संयोजकमा पूर्व सहायक प्रमुख जिल्ला अधिकारी जयनारायण यादव चयन भएका छन् । समितिमा अन्य महत्वपूर्ण सदस्यहरूको पनि चयन गरिएको छ । सदस्यहरुमा सुनसरीका शम्भु अधिकारी र रविन्द्र बहादुर अधिकारी, मोरङका रामप्रसाद परियार, धनकुटाका शान्तवीर लामा, मोरङका धर्ती कुमार विश्वास र सुनसरीकी सीता तामाङ समावेश छन् ।

भेलामा अभियानका राष्ट्रिय संयोजक सुनिल कुमार यादवको अध्यक्षतामा बैठक सम्पन्न भएको थियो । सो कार्यक्रममा अभियानका सदस्यहरू तथा विभिन्न क्षेत्रका अगुवाहरूको उल्लेख्य उपस्थिति रहेको थियो । अभियानले चुरे क्षेत्रको संरक्षण, वनविनाशको रोकथाम तथा वन्यजन्तुहरूलाई सुरक्षित वातावरण उपलब्ध गराउनका लागि विशेष योजना अघि सार्ने उद्देश्य लिएको छ ।

अभियानको मुख्य ध्यान चुरे पहाडी क्षेत्रको स्थायित्व, माटो कटान तथा बाढीपहिरो नियन्त्रणमा केन्द्रित हुनेछ । समितिले चुरे क्षेत्रका वन तथा पर्यावरणलाई संरक्षण गर्न विभिन्न कार्यक्रमहरूको आयोजना गर्ने र स्थानीय तहसँग समन्वय गर्दै जनचेतना फैलाउने कार्यमा सक्रिय सहभागिता जनाउने बताइएको छ ।

चुरे क्षेत्रमा हुने वातावरणीय असन्तुलनले समग्र प्रदेशलाई दीर्घकालीन असर पुर्याउन सक्छ भन्ने विषयलाई ध्यानमा राख्दै यस अभियानले आगामी दिनमा थप ठोस कदम चाल्न आवश्यक रहेको सरोकारवालाहरूले बताएका छन् ।