उत्तर प्रदेश, ६ माघ । १४४ वर्षपछि आयोजित महाकुम्भ मेलामा आगलगीको घटनाले हलचल मचाएको छ । महाकुम्भको सेक्टर १९ मा ग्यास सिलिन्डर ब्लास्टका कारण भएको आगलगीमा २०० भन्दा बढी पाल जलेर ध्वस्त भएका छन् ।

सूचना अनुसार खाना पकाउने क्रममा ग्यास सिलिन्डरको विस्फोट हुँदा आगो फैलिएको थियो । जसका कारण एकै पटक २०० भन्दा बढी पालमा आगो पुगेको थियो । घटनापछि २० मिनेट भित्र एनडिआरएफ र दमकलको टोलीले आगो नियन्त्रणमा ल्याए र उक्त क्षति रोकिएको छ ।

घटनाबारे जानकारी पाएपछि उत्तर प्रदेशका मुख्यमन्त्री योगी आदित्यनाथले सम्बन्धित निकायलाई थप सर्तकता अपनाउन निर्देशन दिएका छन् ।

घटनामा घाइते भएका व्यक्तिहरूलाई शीघ्र उपचारको व्यवस्था गरिएको र स्थानीय प्रशासनले स्थिति नियन्त्रणमा ल्याएको जनाइएको छ ।