एजेन्सी, ५ माघ । इरानको राजधानी तेहरानस्थित सर्वोच्च अदालतको भवनमा शनिबार भएको गोलीकाण्डमा दुई न्यायाधीशको मृत्यु भएको छ ।

न्यायपालिका स्रोतका अनुसार तीन न्यायाधीशलाई लक्षित गरी गरिएको आक्रमणमा अली रजिनी र मोहम्मद मोगिसेह नामका दुई न्यायाधीशको मृत्यु भएको हो ।

आक्रमणकारीले घटनापछि आत्महत्या गरेको बताइएको छ । अर्को एक न्यायाधीश घाइते भएको जानकारी प्राप्त भएको छ । मिजान अनलाइनका अनुसार मारिएका न्यायाधीशहरूले ‘राष्ट्रिय सुरक्षा, जासूसी र आतंकवादविरुद्धका अपराधहरू’ सम्बन्धी मुद्दाहरूको सुनुवाइ गरिरहेका थिए ।

घटनामा संलग्न आक्रमणकारीको पहिचान भने खुलाइएको छैन । सर्वोच्च अदालतमा कुनै विशेष मुद्दामा आक्रमणकारीको संलग्नता नभएको जानकारी दिइएको छ । अधिकारीहरूले घटनाको अनुसन्धान सुरु गरेको बताएका छन् ।

अमेरिकी अर्थ मन्त्रालयका अनुसार ६८ वर्षीय मोहम्मद मोगिसेहलाई सन् २०१९ मा संयुक्त राज्य अमेरिकाले प्रतिबन्ध लगाएको थियो ।अली रजिनी इरानी न्यायपालिकामा उच्च पदमा रहेका व्यक्तिहरूमा पर्दथे ।

यो गोलीकाण्ड इरानमा उच्चस्तरीय व्यक्तिहरूलाई लक्षित गरी भएको दुर्लभ घटनामा पर्छ । यसले देशमा असुरक्षा र तनावको वातावरणलाई थप गहिरो बनाएको छ ।