जनकपुरधाम, ९ असार । मधेस प्रदेशका मुख्यमन्त्री लालबाबु राउतले विज्ञान प्रविधिको विकास नै विकासको मुल आधार रहेको बताएका छन् ।

युवा परिषद् नेपालको आयोजनामा जनकपुरधाममा भएको दुई दिवसिय राष्ट्रिय युवा वैज्ञानिक सम्मेलनको उद्घाटन सत्रलाई सम्बोधन गर्दै मुख्यमन्त्री राउतले यस्तो बताएका हुन् ।

विज्ञानको अध्ययनले कुनैपनी समाजको गरिबी दुर गर्न सकिने बताउँदै उनले नेपाल जस्तो आर्थिक रुपले पछाडी परेको देशको विकासको मुहान नै विज्ञानको विकास बन्नेमा आफू विश्वस्त रहेकोसमेत बताए ।

विज्ञान प्रविधिमा हामी पछाडी रहेको मुल कारण केन्द्रिकृत मानसिकता रहेको टिप्पणी गर्दै राउतले मधेस प्रदेशको लक्ष्य नै विज्ञान प्रविधिको विकास र स्थानिय स्तरको प्रविधिको अनुसन्धान रहेको जिकिर गरे ।

प्रदेश निर्माण भईसक्दा समेत संघ अझै अधिकार दिनमा कंजुस्याई गरिरहेकोले आफ्नो प्रदेशले लिएको लक्ष्य प्राप्ती गर्न केही समय अझै लाग्ने उनको कथन थियो ।

विज्ञान प्रविधिको विकासलाई मुलाधारमा ल्याउन मधेस प्रदेश सरकारले १२ कक्षामा अध्ययन गर्ने चेलिबेटीलाई ल्यापटप वितरण गर्ने योजनाले प्रभावकारी भुमिका खेल्नेमा आफू विश्वस्त रहेकोसमेत उनले दावी गरे ।