काठमाडौं, २० पुस । राष्ट्रियसभा निर्वाचनअन्तर्गत आज मनोनयन दर्ता हुँदैछ । १९ पदमा मनोनयन दर्ता हुन लागेको हो ।

सातवटै प्रदेशका राजधानीहरुमा स्थापना गरिएको निर्वाचन अधिकृतको कार्यालयमा बिहान १० बजेदेखि दिउँसो ३ बजेसम्म मनोनयन दर्ता हुने निर्वाचन आयोगले जनाएको छ ।

उम्मेदवार छनोट गर्दा राष्ट्रियसभा निर्वाचनसम्बन्धी कानुनअनुसार अन्य, महिला, अल्पसंख्यक समुदाय वा अपाङ्गता भएका व्यक्ति र दलित समुदायलाई ध्यान दिनुपर्छ । तर, कांग्रेस र नेकपा (एकीकृत समाजवादी) ले भने एकजना पनि दलित समुदायबाट राष्ट्रियसभा सदस्यको उम्मेदवार बनाएका छैनन् ।

एमालेले भने १९ जनामा तीनजना दलित समुदायबाट उम्मेदवार बनाएको छ । यस्तै, सत्तासीन ५ दलले १९ जना राष्ट्रियसभा सदस्यको उम्मेदवार छनोटमा सोमबार भागबण्डा गरेको थियो । भागबण्डाको क्रममा कांग्रेसलाई ६, माओवादी र नेकपा (एकीकृत समाजवादी) लाई ५÷५, जनता समाजवादीलाई २ र राष्ट्रिय जनमोर्चालाई १ सिट परेको थियो ।

पुस २० देखि २५ गतेसम्म उम्मेदवारको अन्तिम नामावली र दललाई निर्वाचन चिह्न प्रदान गर्ने कार्यक्रम तय भएको छ ।

राष्ट्रिय सभाका सदस्यमध्ये आगामी फागुन २० गते १९ सदस्यको पद रिक्त हुँदै छ । नेकपा एमालेका ८, नेकपा एकीकृत समाजवादीका ४, नेकपा माओवादी केन्द्रका ४ र नेपाली कांग्रेसका ३ जना सदस्य राष्ट्रिय सभा सदस्यबाट बाहिरिँदै छन् ।

निर्वाचनका लागि ५३२ प्रदेशसभा सदस्यहरु र गाउँपालिका अध्यक्ष तथा उपाध्यक्ष एवम् नगरपालिकाका प्रमुख तथा उपप्रमुख १ हजार ४९३ गरी जम्मा २ हजार २५ जनालाई आयोगले मतदाता कायम गरेको छ ।

२०७४ को फागुनमा ४ बर्से कार्यकालका लागि निर्वाचित २० जना सदस्यको पदावधि आगामी २० फागुनमा सकिँदै छ । उनीहरूको ठाउँमा निर्वाचन हुन लागेको हो ।