सर्लाही, १६ पुस । स्थानीय प्रशासनले सर्लाहीको बयलवासमा लगाएको निषेधाज्ञा हटेको छ ।

पुस ११ गते राति भएको सवारी दुर्घटना सम्बन्धी विषयलाई लिएर जिल्लाको ईश्वरपुर नगरपालिका क्षेत्रमा भएको सार्वजनिक सम्पत्तिको तोडफोड, आगजनीलगायत गरिरहेको विरोध प्रदर्शनका कारण सर्वसाधारणको सुरक्षामा पर्न सक्ने सम्भावित जोखिमलाई मध्यनजर गर्दै मंगलबार बेलुका ३ बजेदेखि बुधबार बेलुका ७ बजेसम्मका लागि लगाइएको निषेधाज्ञालाई बढाएर पुनः आज बेलुका ७ बजेसम्मका लागि थपिएको थियो । ७ बजेपछि निषेधाज्ञा हटाइएको हो ।

प्रहरीको भ्यानबाट स्थानीय व्यवसायीको मृत्यु भएपछि त्यसको विरोधमा दुई दिनदेखि भइरहेको प्रदर्शनलाई साम्य पार्नका लागि प्रमुख जिल्ला अधिकारी स्थानेश्वर गौतमले निषेधाज्ञा जारी गरेका थिए ।

गत आइतवार राति प्रहरी भ्यानको ठक्करबाट ईश्वरपुर नगरपालिका–५, सखुबनी खुबलाल टोलका ३० वर्षीय राम कुमार महतोको मृत्यु भएको घटनालाई लिएर आक्रोशित स्थानीयवासीले प्रदर्शन गरिरहेका थिए ।

मंगलबार प्रमुख जिल्ला अधिकारी, ईश्वरपुरका मेयर मनोज देवकोटा, मलंगवाका मेयर निरसल साह, प्रहरी उपरीक्षक कृष्ण प्रसाईं, सशस्त्र प्रहरी उपरीक्षक, पीडित परिवारका प्रतिनिधि लगायतको टोली ईलाका प्रहरी कार्यालय केशरगंजमा छलफल गर्दागर्दै आक्रोशित भिडले प्रहरी कार्यालयमै ढुंगामुढा गरेका थिए ।