काठमाडौं, १६ पुस । अख्तियार दुरूपयोग अनुसन्धान आयोगले सर्लाहीका एक वडाध्यक्षसहित तीन जनाविरूद्ध भ्रष्टाचारको मुद्दा दायर गरेको छ ।

काठमाडौंस्थित विशेष अदालतमा शुक्रबार अख्तियारले ईश्वरपुर नगरपालिका–११ का वडाध्यक्ष राम दुलार साहसहित तीन जनाविरूद्ध भ्रष्टाचारको मुद्दा दायर गरेको अख्तियारका प्रवक्ता नारायणप्रसाद रिसालले जानकारी दिए ।

वडाध्यक्ष साहसँगै वडा सदस्यद्वय सोनेलाल साह रौनियार र उमेश रायविरूद्ध भ्रष्टाचारको मुद्दा दायर गरिएको रिसालले बताए ।

भलुवाई सडकमा ढलान गरेपछि उपभोक्ता समितिलाई काम सम्पन्न सिफारिस गरेबापत १ लाख ५० हजार रुपैयाँ घुस मागेको सूचना अख्तियारले पाएपछि वडाध्यक्ष साहसहित तीन जनालाई पक्राउ गरेको थियो ।

वडासदस्यद्वय रौनियार र रायलाई सेवाग्राहीबाट १ लाख ५० हजार रुपैयाँ घुस लिइसकेको अवस्थामा कात्तिक २९ गते पक्राउ गरिएको थियो भने थप अनुसन्धानबाट वडाध्यक्ष साहले पनि घुस मागेको पुष्टि भएपछि अख्तियारले मुद्दा दायर गरेको हो ।

उनीहरूमाथि भ्रष्टाचार निवारण ऐन २०५९ को दफा ३ को उपदफा (१) र दफा ३ को उपदफा (१) को खण्ड (घ) बमोजिम सजाय हुन मागदाबी गरेको छ ।