जनकपुरधाम, १४ पुस । जनकपुरधामस्थित राजर्षि जनक विश्वविद्यालयको पठनपाठन अनिश्चितकालका लागि बन्द गरिएको छ ।

स्थानीय रामानन्दचोकस्थित क्याम्पसमा अध्ययनरत विद्यार्थीहरुले समय समयमा शैक्षिक भ्रमण तथा अतिरिक्त क्रियाकलापका लागि विभिन्न किसिमका बन्द, आन्दोलन तथा तोडफोडका क्रियाकलापहरु गर्दै आईरहेकोले असहज परिस्थिती उत्पन्न हुँदा पठन पाठन बन्द गरिएको कार्यवाहक क्याम्पस प्रमुख विनोद कुमार कर्णले बताए ।

विद्यार्थीहरुको गतिविधिबारे माथिल्लो निकायमा बारम्बार जानकारी गराउँदा पनि सुनुवाई नभएकाले नियमित रुपमा क्याम्पस सञ्चालन गर्न असहज परिस्थिति सृजना हुँदा पुस १५ गते शुक्रबारदेखि समस्या समाधान नभएसम्म अनिश्चितकालका लागि क्याम्पसको सम्पूर्ण पठन पाठन स्थगित गरिएको कार्यवाहक क्याम्पस प्रमुख कुमार कर्णले जानकारी दिएका छन् ।

यसअघि विद्यार्थीहरुले कार्यवाहक प्रमुख कर्णलाई विगत दुई दिनदेखि क्याम्पसभित्रै थुन्दै आएका थिए । कर्णलाई बिएससी सिएसआईटी तेस्रो बर्षमा अध्ययनरत पाँचौ सेमेष्टरका विद्यार्थीहरुले शैक्षिक भ्रमणवापत क्याम्पसले पैसा उपलब्ध नगराएको भन्दै क्याम्पसभित्र थुनेका थिए ।

विद्यार्थीहरुले शैक्षिक भ्रमणसहित सफ्टवेयर, नेटवर्क, डाटा सेन्टर, कम्यूनिकेशन सर्भर र प्रोग्रामिंगका लागि क्याम्पससँग बजेट माग गरेका थिए । उनीहरुले स्लेवशमै शैक्षिक भ्रमण गराउने उल्लेख रहेको र सोवापत नामांकन गराउने समयमै आफूहरुसँग क्याम्पसले पैसा लिइसकेपनि भ्रमणमा जाने बेलामा पैसा उपलब्ध नगराएको बिएससी सिएसआईटी पाँचौ सेमेष्टरमा अध्ययनरत विद्यार्थी राकेश यादवले बताए ।

क्याम्पस प्रमुख कर्णले विज्ञान तथा प्रविधि संकायका डिन प्रा.डा.श्याम किशोर महतोसँग सहयोग मागेका थिए । महतोले सोमबार मेगा बैंकमा रहेको खाताबाट ९० हजार रुपैयाँको चेक दिएपनि सो खाता बन्द रहेको पाएपछि विद्यार्थीहरु थप आन्दोलित भएका छन् ।