महोत्तरी, १४ पुस । महोत्तरीमा मुसहर समुदायका व्यक्तिहरुले कोरोनाविरुद्धको खोप अझै लगाउन पाएका छैनन् ।

कोरोना संक्रमण रोकथामका लागि सरकारले खोप अभियान तीव्र बनाए पनि महोत्तरीमा भने प्रचारप्रसारको कमीले मुसहर समुदाय खोप लगाउनबाट वञ्चित भएका हुन् ।

स्थानीय सुनिल सदाले भने,‘खोप अभियान कहाँ चलाइएको छ भन्नेसम्मको जानकारी नहुँदा हाम्रो समुदाय खोप लगाउनबाट वञ्चित बनिरहेको छ । अनुकूल भएसम्म बस्तीमै पुगेर खोप अभियान चलाइदिन हाम्रो समुदायको अपिल छ ।’

जिल्लाकै सबैभन्दा बढी जनसंख्या भएको बर्दिबासस्थित नमुना बस्तीमा बसोबास गर्ने मुसहरहरूले अहिलेसम्म खोप लगाउन पाएका छैनन । बर्दिबासमा १५२ घरधुरी बसोबास गर्दै आएका छन् । स्वास्थ्य चौकी नजिक हुनेहरूले खोप लगाए पनि प्रायः मुसहरहरूले खोप लगाउन नसकेको उनीहरूले बताएका छन् ।

पछिल्लो समय मोडर्ना खोप १२ देखि १७ वर्ष उमेर समूहलाई विद्यालयमै पुगेर लगाउन अनिवार्य गरिएको छ । तर विद्यालयमा समेत नियमित उपस्थित हुन नसक्ने मुसहर समुदायका बालबालिकाहरू मोडर्ना खोप लिनबाट वञ्चित बनेको स्वास्थ्यकर्मीहरूले जनाएका छन् ।

महोत्तरीमा अहिलेसम्म १५ वटै स्थानिय तहमा झन्डै ५४ प्रतिशत जनसंख्याले खोप लगाइसकेका छन् । तर मुसहर बस्तीका मुसहरहरूले खोप लगाउन पाएका छैनन् ।