जनकपुरधाम, १३ पुस । स्थानीय प्रशासनले सर्लाहीको बयलवासमा आजदेखि निषेधाज्ञा लगाएको छ ।

पुस ११ गते राति भएको सवारी दुर्घटना सम्बन्धी विषयलाई लिएर जिल्लाको ईश्वरपुर नगरपालिका क्षेत्रमा भएको सार्वजनिक सम्पत्तिको तोडफोड, आगजनीलगायत गरिरहेको विरोध प्रदर्शनका कारण सर्वसाधारणको सुरक्षामा पर्न सक्ने सम्भावित जोखिमलाई मध्यनजर गर्दै मंगलबार बेलुका ३ बजेदेखि बुधबार बेलुका ७ बजेसम्मका लागि निषेधाज्ञा जारी गरिएको हो ।

प्रहरीको भ्यानबाट स्थानीय व्यवसायीको मृत्यु भएपछि त्यसको विरोधमा दुई दिनदेखि भइरहेको प्रदर्शनलाई साम्य पार्नका लागि प्रमुख जिल्ला अधिकारी स्थानेश्वर गौतमले निषेधाज्ञा जारी गरेका हुन् ।

कुनै किसिमको भेला हुन, बाहिर हिडडुल गर्न तथा राजनीतिक सभा एवं गतिविधि गर्न नपाउने गरी स्थानीय प्रशासन ऐन, २०२८ को दफा ६ (२) र (३) बमोजिम ईलाका प्रहरी कार्यालय केशरगंजबाट पुर्व ईश्वरपुर नगरपालिकाको वडा नं. ४ सागरनाथ टोलसम्म र पश्चिममा वडा नं. ८ रामपुर टोलसम्म तथा उत्तरमा वडा नं. ५ सखुवनी टोलसम्म एवं दक्षिणमा वडा नं. ९ खोरिया टोलसम्म निषेधाज्ञा आदेश जारी गरिएको छ ।

आदेश उल्लंघन गर्ने व्यक्तिलाई सुरक्षामा खटिएका सुरक्षाकर्मीले नियन्त्रणमा लिई कानून बमोजिम कारवाही गर्नसक्ने समेत सूचनामा उल्लेख छ ।

आइतवार राति प्रहरी भ्यानको ठक्करबाट ईश्वरपुर नगरपालिका–५, सखुबनी खुबलाल टोलका ३० वर्षीय राम कुमार महतोको मृत्यु भएको घटनालाई लिएर आक्रोशित स्थानीयवासीले प्रदर्शन गरिरहेका छन् ।

मंगलबार प्रमुख जिल्ला अधिकारी, ईश्वरपुरका मेयर मनोज देवकोटा, मलंगवाका मेयर निरसल साह, प्रहरी उपरीक्षक कृष्ण प्रसाईं, सशस्त्र प्रहरी उपरीक्षक, पीडित परिवारका प्रतिनिधि लगायतको टोली ईलाका प्रहरी कार्यालय केशरगंजमा छलफल गर्दागर्दै आक्रोशित भिडले प्रहरी कार्यालयमै ढुंगामुढा गरेका हुन् ।

निषेधाज्ञा लगाइएपछि समेत स्थानीयवासी र प्रहरीबीच पटक–पटक झडप भएको छ । प्रहरीले स्थिति नियन्त्रणमा लिन दर्जनौँ शेल अश्रुग्याँससहित हवाइ फायर गरेपनि प्रदर्शन रोकिएको छैन् ।

झडपमा जिल्ला प्रहरी कार्यालय सर्लाहीका प्रहरी निरीक्षक कृष्ण गिरीसहित दर्जनौं प्रहरी घाइते भएका छन् भने प्रहरीले चलाएको गोली लागेर आन्दोलित स्थानीयवासी पनि घाइते भएका छन् ।

यता पिडित परिवारसँग भेटन् घरमा पुगेका ईश्वरपुरका मेयर देवकोटामाथि समेत आक्रमण भएको छ ।
.