काठमाडौं, ११ पुस । लोकतान्त्रिक समाजवादी पार्टी (लोसपा)नेपाल भित्र आन्तरिक विवाद बढ्दै गएको छ ।

जिल्ला अध्यक्ष तथा प्रदेश पदाधिकारी नियुक्तीमा पार्टी अध्यक्ष महन्थ ठाकुरले एकलौटी गर्दै आसेपासेलाई ग्राहयता दिएको आरोप लगाउँदै पार्टीकै नेता कार्यकर्ताहरुले आइतबार केन्द्रीय कार्यालय घेराउ गरेका छन् ।

अध्यक्ष ठाकुरको एकल निर्णय सच्याउनुपर्ने माग गर्दै काठमाण्डौस्थित पार्टीको केन्द्रय कार्यालय घेराउ गर्दै उनीहरुले धर्ना दिएका छन् ।

लोसपा नेतृ विन्दु ठाकुरले भनिन्,‘हामीले आइतवार पार्टीको केन्द्रिय कार्यालयमा पुगेर अध्यक्ष ठाकुरसँग भेटघाट गर्न समय मागेका थियौं । तर, अध्यक्ष ठाकुरले हामीसँग भेट गर्न नमानेपछि पार्टी कार्यालय घेराउ गर्दै धर्ना दिएका छौं ।’

पार्टीको विधानमा अध्यक्षलाई विना छलफल कसैलाई मनोमानी नियुक्ती गर्ने अधिकार नै नभएकोले सो नियुक्ती रद्द नगरेसम्म पार्टी कार्यालय घेराउ देखि लिएर तालाबन्दीसम्म जारी राख्ने नेता धिरेन्द्र प्रसाद सिंहले बताए ।