काठमाडौं, ११ पुस । नेकपा एमालेका अध्यक्ष केपी शर्मा ओली नेकपा माओवादी केन्द्रको राष्ट्रिय महाधिवेशनमा सहभागी नहुने भएका छन् ।

पार्टी अध्यक्ष पुष्पकमल दाहाल प्रचण्डले ओलीलाई फोन गरी महाधिवेशनको उद्घाटन सत्रमा आउन निम्ता दिएका थिए ।

जवाफमा ओलीले आफू झापामा भएकाले आफ्नो सट्टा शंकर पोखरेललाई पठाउने बताएका छन् ।

नेपाल कम्युनिष्ट पार्टी फुटेसँगै दुबैको सम्बन्धमा दरार पैदा भएको छ । सार्वजनिक कार्यक्रममा दुवैले एक अर्काको आलोचना गर्दै आइरहेका छन् ।

एमालेको १०औं महाधिवेशनमा प्रचण्डले निम्ता पाए पनि उनी सहभागी भएका थिएनन् । उनले आफ्नो सट्टा लीलामणि पोखरेललाई पठाएका थिए ।

माओवादी केन्द्रले प्रधानमन्त्री तथा कांग्रेस सभापति शेरबहादुर देउवा, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादवलगायतका नेताहरूलाई महाधिवेशनमा सरिक हुन निम्ता दिएको छ ।

महाधिवेशनमा १६ सयभन्दा बढी प्रतिनिधि सहभागी हुँदैछन् । जसमा १४८ जना अध्यक्ष प्रचण्डले मनोनित गरेका छन् ।