जनकपुरधाम, ११ पुस । प्रदेश २ सरकारले आज बस्न लागेको प्रदेशसभा आठौं अधिवेशनको चौथो बैठकमा ‘प्रदेश प्राविधिक विश्वविद्यालय अध्यादेश २०७८’ पेश गर्न लागेको छ ।

आजको बैठकमा सो अध्यादेश पेश गर्ने कार्यसूची रहेको प्रदेशसभाका सचिव रञ्जित कुमार यादवले जानकारी दिए ।

केही साताअघि प्रदेश सरकारले ल्याएको दुईवटा अध्यादेशमध्ये ‘प्रदेश कृषि विश्वविद्यालय अध्यादेश २०७८’ प्रदेशसभामा स्वीकृत भएपछि सरकारले आज अर्को अध्यादेश पेश गर्न लागेको हो ।

प्रदेशसकारको तर्फबाट सामाजिक विकासमन्त्री नवल किशोर साहले सो अध्यादेश पेश गर्नेछन् । मन्त्री साहले प्रस्ताव पेश गरेपछि अध्यादेश अस्वीकार गर्ने प्रस्ताव माथि छलफल प्रारम्भ हुनेछ ।

मन्त्री साहले पेश गर्ने अध्यादेशको विरोधमा प्रमुख प्रतिपक्षी दल लोकतान्त्रिक समाजवादी पार्टीका प्रमुख सचेतक परमेश्वर साहले अध्यादेश अस्वीकृत गर्न प्रस्ताव पेश गर्ने कार्यसूची रहेको छ ।

अध्यादेश अस्वीकृत गर्ने प्रस्तावमा छलफल पश्चात मन्त्री साहले जवाफ दिने र मन्त्रीले अध्यादेश पेश गरेपछि पुनः छलफल हुने कार्यसूची रहेको प्रदेशसभा सचिवालयले जनाएको छ ।