काठमाडौं, १० पुस । राष्ट्रिय सभा सदस्य निर्वाचनका लागि निर्वाचन आयोगमा १२ वटा दल दर्ता भएका छन् । आगामी माघ १२ गते हुने निर्वाचनका लागि दल दर्ताको समयावधि शनिबारसम्म तोकिएकोमा १२ वटा दल दर्ता भएका छन् ।

आयोगमा शुक्रबार माओवादी केन्द्र, नेकपा एमाले, एकीकृत समाजवादी, राष्ट्रिय जनमोर्चा पार्टी, नेपाल मजदुर किसान पार्टी, नेपाल लोकतान्त्रिक पार्टी, जनता समाजवादी पार्टी (जसपा) र ऐतिहासिक प्रजातान्त्रिक जनता पार्टीले निवेदन दिएका थिए ।

त्यसैगरी, शनिबार लोकतान्त्रिक समाजवादी पार्टी नेपाल, राष्ट्रिय प्रजातन्त्र पार्टी, नेपाली कांग्रेस र नेपाल परिवार दलले दल दर्ता गराएको आयोगका प्रवक्ता शालिग्राम शर्मा पौडेलले जानकारी दिए ।

आयोगले बैठक डाकेर दलहरुलाई निर्वाचन चिह्न प्रदान गर्ने तयारी गरेको छ । पुस २० देखि २५ गतेसम्म उम्मेदवारको अन्तिम नामावली र दललाई निर्वाचन चिह्न प्रदान गर्ने कार्यक्रम तय भएको प्रवक्ता शर्माले जानकारी दिए ।

राष्ट्रिय सभाका सदस्यमध्ये आगामी फागुन २० गते १९ सदस्यको पद रिक्त हुँदै छ । नेकपा एमालेका ८, नेकपा एकीकृत समाजवादीका ४, नेकपा माओवादी केन्द्रका ४ र नेपाली कांग्रेसका ३ जना सदस्य राष्ट्रिय सभा सदस्यबाट बाहिरिँदै छन् ।

निर्वाचनका लागि ५३२ प्रदेशसभा सदस्यहरु र गाउँपालिका अध्यक्ष तथा उपाध्यक्ष एवम् नगरपालिकाका प्रमुख तथा उपप्रमुख १ हजार ४९३ गरी जम्मा २ हजार २५ जनालाई आयोगले मतदाता कायम गरेको छ ।