जनकपुरधाम, ९ पुस । जनकपुरधाम उपमहानगरपालिकाअन्तर्गतका सामुदायिक विद्यालयमा कार्यरत बालविकास शिक्षक तथा विद्यालय कर्मचारीहरूको धर्ना स्थगित भएको छ ।

तलबको माग गर्दै उनीहरु विगत तिन दिनदेखि उपमहानगरको कार्यालयअगाडि धर्ना दिईरहेका थिए ।

बाल विकास शिक्षक तथा विद्यालय कर्मचारी संयुक्त संघर्ष समितिको निर्णय अनुसार जनकपुरधाम उपमहानगरपालिकाका प्रतिनिधिसँग भएको सम्झौता अनुरुप विगत तिन दिनदेखि जारी रहेको धर्ना हाललाई आजदेखि स्थगित गरिएको बाल विकास शिक्षक तथा विद्यालय कर्मचारी संयुक्त संघर्ष समितिका संयोजक रामहृदय यादवले बताए ।

उनले पुस मसान्त भित्र आफूहरुको माग सम्बोधन नगरिए माघ १ गतेदेखि पुनः आन्दोलनमा उत्रने चेतावनीसमेत दिए ।

बालविकासका शिक्षकले मासिक ६ हजार रुपैयाँमा चित्त बुझाउनु पर्ने अवस्थाको अन्त्य हुनुपर्ने र सरकारी तहबाट भएको यो विभेदलाई यथाशीघ्र सच्याउनु पर्ने आफूहरूको माग रहेको यादवले बताए ।

बालविकास शिक्षक संघर्ष समितिका सहसंयोजक संजु यादवले लेखापालको मासिक तलव १८ हजार ५ सय र बालविकास शिक्षक तथा कार्यालय सहयोगीको तलब १५ हजार हुनुपर्ने माग गरेकी छन् ।

उपमहानगरपालिका अन्तर्गतका सामुदायिक विद्यालयमा कार्यरत बालविकास शिक्षक तथा विद्यालय कर्मचारीले तोकिएको पारिश्रमिक उपलब्ध गराउन उपमहानगरसँग माग गरे पनि नगरप्रमुख लालकिशोर साहले सुनुवाइ नगरेपछि उनीहरू धर्नामा बसेका थिए ।

संघीय सरकारले गत जेठ महिनामा ल्याएको बजेटमार्फत् गत साउन महिनादेखि लागू हुनेगरी बालविकास शिक्षक र विद्यालय कर्मचारीको तलब वृद्धि गर्ने घोषणा गरेको थियो । सरकारको उक्त निर्णयअनुसार धनुषाकै गणेशमान चारनाथ नगरपालिका, सबैला नगरपालिका, धनुषाधाम नगरपालिका, लक्ष्मीनियाँ गाउँपालिकालगायत अधिकांश स्थानीय तहले तलब वितरण गरिसकेका छन् ।

जनकपुरधाम उपमहानगरपालिकाभित्रका ५१ वटा सामुदायिक विद्यालयमा १५१ जना बाल विकास शिक्षक तथा विद्यालय कर्मचारीहरु कार्यरत छन् ।