जनकपुरधाम, ८ पुस । प्रदेश २ सरकारले ल्याएको प्रदेश कृषि विश्वविद्यालय सम्बन्धी अध्यादेश बिहीबारको बैठकबाट बहुमतले स्विकृत भएको छ ।

आजको बैठकमा सामाजिक विकासमन्त्री नवल किशोर साहले कृषि विश्वविद्यालय सम्बन्धी अध्यादेश २०७८ लाई स्विकृत गरियोस भन्ने प्रस्ताव पेश गरेकोमा सो प्रस्तावलाई बहुमतले स्विकृत भएको घोषणा उपसभामुख उपमादेवले गरेकी छन् । लोसपा बाहेक अन्य दलहरुले समर्थन जनाएपछि सो अध्यादेश स्विकृत भएको हो ।

त्यसअघि प्रमुख प्रतिपक्षी दल लोकतान्त्रिक समाजवादी पार्टीका प्रमुख सचेतक परमेश्वर साहले प्रदेश कृषि विश्वविद्यालय २०७८ अस्विकार गर्न पेश गरेको प्रस्ताव बहुमतले अस्विकृत भएको थियो ।

छलफलका क्रममा सत्तारुढ दल नेपाली कांग्रेसका प्रदेशसभा सदस्य शिवचन्द्र चौधरीले अध्यादेश ल्याउने तरिका गलत भएपनि विधेयक नै रद्द गर्नुपर्ने आवश्यकता नरहेको बताए । यद्यपी उनले विश्वविद्यालयको नाममा आपत्ति जनाए । उनले भने,‘विश्वविद्यालय विश्वभरिका व्यक्ति आएर पढने ठाउँ हो, यसमा प्रदेशको टोपी लगाइदिने ? सुन्नु भएछ यस्तो नाम कहिल्यै ?’उनले विश्वविद्यालयमा प्रदेश थपेपछि त्यसको महत्व घटने बताए ।

यस्तै प्रमुख प्रतिपक्षी दल लोसपाका सांसद जानकी शरण साहले प्रदेश सरकारले ल्याएको अध्यादेशमा आफ्नो विरोध रहेको बताए । उनले सामान्य स्थितिमा समेत अध्यादेश ल्याउनु खेदजनक रहेको बताए ।