जनकपुरधाम, ८ पुस । प्रदेश नम्बर–२ को बिहीबार बसेको प्रदेशसभा बैठकमा प्रदेशको नामकरणका लागि पाँच वटा प्रस्ताव पेश गरिएको छ ।

आजको बैठकमा ‘मधेश प्रदेश’, ‘जानकी प्रदेश’, ‘मध्यमधेश प्रदेश’ र ‘मिथिला भोजपुरा’ नाम पेश भएको हो ।

सत्तारुढ दल जनता समाजवादी पार्टी र नेकपा माओवादी केन्द्रबाट मधेश प्रदेश नामका लागि प्रस्ताव पेश गरिएको छ । प्रमुख प्रतिपक्षी दल लोकतान्त्रिक समाजवादी पार्टीले भने त्यसको समर्थन गरेको छ ।

त्यस्तै, सत्तारुढ दल नेकपा एकिकृत समाजवादी पार्टीको तर्फबाट प्रदेशको नाम जानकी प्रस्ताव गरिएको छ । कांग्रेसले मिथिला भोजपुरा नामका लागि प्रस्ताव पेश गरेको छ भने कांग्रेसकै प्रदेशसभा सदस्य राजेश्वर प्रसाद शाले मध्य मधेश प्रस्ताव पेश गरेका छन् ।

जसपाको तर्फबाट शैलेन्द्र कुमार यादव, माओवादी केन्द्रको तर्फबाट भरत प्रसाद साह, नेकपा एकिकृत समाजवादीको तर्फबाट प्रमोद कुमार यादव, नेपाली कांग्रेसको तर्फबाट शिवचन्द्र चौधरीले नामको प्रस्ताव पेश गरेका छन् ।

नेकपा एमालेको तर्फबाट प्रस्ताव गरिएको नामकरणको प्रस्ताव भने आज पेश हुन सकेको छैन् । सभामुख सरोज यादवले शारदा थापाले नामाकरण सम्बन्धमा पेश गर्ने भनिएको प्रस्ताव कार्यसूचीबाट हटाइएको जानकारी दिए ।

अधिकांश प्रदेशसभा सदस्यहरुले भने प्रदेशको स्थायी राजधानीको सवालमा जनकपुर नै हुनुपर्ने बताएका छन् । केहि प्रदेशसभा सदस्यले वीरगञ्जलाई राजधानी बनाउनुपर्ने माग गरेका छन् ।

सुन्दर विश्वकर्मा, अभिराम शर्मा, डा. रिना यादव, सुरिता साह, करिमा बेगम, भिमा रावल, ज्ञानेन्द्र कुमार यादवलगायतकाले स्थायी राजधानी र प्रदेश नामाकरणको सम्बन्धी छलफलमा बोलेका थिए । भने प्रदेशसभा सदस्य राजेश्वर प्रसाद शाहले प्रदेशको राजधानी वीरगञ्ज हुनुपर्ने माग गरे ।