जनकपुरधाम, ८ पुस । नेपाली काँग्रेसको प्रदेश २ नयाँ कार्यसमिति चयन गर्न जारी मतदानमा हालसम्म १ हजार ८०० भन्दा बढि मत खसिसकेको छ ।

जनकपुरधामस्थित गोपाल धर्मशालामा बिहान करिव साढे ९ बजेदेखि जारी निर्वाचनमा अहिलेसम्म सो संख्यामा मत खसेको हो ।

मतदान साँझ ७ बजेसम्म चल्ने निर्वाचन समितिका सदस्य अरुण यादवले जानकारी दिएका छन् ।

काँग्रेस प्रदेश २ को नयाँ नेतृत्व चयन गर्न पार्टी सभापति शेरबहादुर देउवा पक्षका कृष्ण प्रसाद यादव र निधि–कोइराला पक्षबाट रामसरोज यादवबीच सभापति पदका लागि प्रतिस्पर्धा भइरहेको छ ।

यस्तै दुई उपसभापतिका लागि ५ जनाबिच प्रतिस्पर्धा छ । देउवा समूहबाट प्रदेश सरकारका महिला, बालबालिका, युवा तथा खेलकुद मन्त्री वीरेन्द्रप्रसाद सिंह र चन्द्रशेखर कुमार यादव तथा निधि–कोइराला समूहबाट धनलाल ठोकर र बिनोदकुमार खनाल चुनावमा होमिएका छन् । उपसभापतिमा रामाधार प्रासद यादव भने स्वतन्त्र उम्मेदवारी दिएका छन् ।

त्यस्तै, दुई महामन्त्रीका लागि ५ जनाको उम्मेदवारी परेको छ । निधि–कोइराला समूहबाट नरेश यादव र हरेश महतो तथा देउवा समुहबाट बृहस्पति कृष्ण श्रेष्ठ र उपेन्द्र कुमार यादवले उम्मेदवारी दिएका हुन् । बिनोद चौधरीले स्वतन्त्र रुपमा उम्मेदवारी दिएका छन् ।
दुई सहमहामन्त्रीका लागि देउवा समूहबाट जयनारायण यादव र परशुराम चौधरी तथा निधि–कोइराला समूहबाट अरविन्द अमात्य र विनोद यादवले उम्मेदवारी दिएका छन् ।

महिलातर्फ १ सहमहामन्त्रीका लागि देउवा समुहबाट रीता यादव उम्मेदवार छन् भने निधि–कोइराला समूहबाट निर्मला सुवेदीले उम्मेदवारी दिएकी छन् । त्यस्तै सहमहमन्त्री खुल्लाबाट २ जनाले स्वतन्त्र उम्मेदवारी दिएका हुन् ।

प्रदेश सदस्य खुल्लामा १४ पदका लागि ५० जना, प्रदेश सदस्य महिला ७ पदका लागि १२ जना, प्रदेश सदस्य खुला प्रत्येक जिल्लाबाट ८ पदका लागि १५ जना, प्रदेश सदस्य प्रत्येक जिल्लाबाट महिला ८ पदका लागि ११ जना, प्रदेश सदस्य खस आर्य १ पदका लागि ४ जना, प्रदेश सदस्य आदिवासी जनजाती खुला १ पदका लागि ३ जना, प्रदेश सदस्य मधेशी खुल्ला ७ पदका लागि १६ जना, प्रदेश सदस्य मधेशी महिला ६ पदका लागि १२ जना, प्रदेश सदस्य दलित खुल्ला ३ पदका लागि १० जना, प्रदेश सदस्य दलित महिला २ पदका लागि ५ जना, प्रदेश सदस्य खुल्ला थारु १ पदका लागि २ जना र प्रदेश सदस्य महिला थारु १ पदका लागि २ जना, प्रदेश सदस्य मुस्लिम खुल्ला २ पदका लागि ५ जना र प्रदेश सदस्य मुस्लिम महिला १ पदका लागि ३ तथा प्रदेश सदस्य अल्पसंख्यक अपांग १ पदका लागि ४ जनाको उम्मेदवारी परेको हो ।

मतदानमा १ हजार ९८० जना प्रतिनिधि सहभागी रहेको निर्वाचन समितिका संयोजक प्रल्हाद गौतमले जानकारी दिए ।