जनकपुरधाम, ८ पुस । प्रदेश नम्बर २ को प्रदेशसभा बैठक आज बस्न लागेको छ ।

आजको बैठकमा प्रदेशको नामाकरण सम्बन्धमा ६ वटा प्रस्ताव पेश गर्ने कार्यसूची रहेको प्रदेशसभा सचिवालयका निमित्त सचिव रञ्जित कुमार यादवले जानकारी दिए । प्रदेशको स्थायी राजधानी तोक्ने विषयमा समेत आजको बैठकमा छलफल हुने यादवले बताए ।

प्रदेशसभा कार्य सञ्चालन (पहिलो संशोधन) नियमावली, २०७५ को नियम ७३ (क) को उपनियम (७) बमोजिम प्रदेशको राजधानी तोक्ने सम्बन्धी प्रस्ताव माथि छलफल प्रारम्भ हुने उनले जानकारी दिए ।

आज बस्न लागेको बैठकमा अध्यादेशमाथि समेत छलफल गर्ने कार्यसूची रहेको छ भने त्यसको विरुद्धमा प्रमुख प्रतिपक्षी दल लोकतान्त्रिक समाजवादी पार्टीका प्रमुख सचेतक परमेश्वर साहले प्रदेश कृषि विश्वविद्यालय अध्यादेश २०७८ अस्विकार गर्ने प्रस्ताव पेश गर्नेछन् ।

यता नेपाली कांग्रेस प्रदेश २ को अधिवेशनअन्तर्गत आज निर्वाचन भइरहेकोले प्रदेशसभा बैठक प्रभावित हुने आंकलन गरिएको छ ।