जनकपुरधाम, ८ पुस । नेपाली कांग्रेस प्रदेश २ को जनकपुरधाममा जारी प्रथम प्रदेश अधिवेशनअन्तर्गत आज बिहानदेखि मतदान प्रक्रिया सुरु भएको छ ।

नयाँ नेतृत्व चयन गर्नका लागि विभिन्न ७२ पदमा १७४ जना उम्मेदवार चुनावी प्रतिस्पर्धामा छन् । जसमध्ये ५ जना सदस्य निर्विरोध निर्वाचित भईसकेका छन् ।

विहान ८ बजेदेखि हुने भनिएको मतदान ९ बजेर ४० मिनेटमा सुरु भएको हो । मतदानमा सर्वप्रथम सभापतिमा क्रम संख्या १ रहेका संस्थापन पक्षका उम्मेदवार कृष्ण प्रसाद यादवले मतदान गरेका छन भने उनकै प्यानलका उपसभापतिका उम्मेदवार प्रदेश २ का महिला, वालवालिका, युवा तथा खेलकुद मन्त्री वीरेन्द्र प्रसाद सिंहले दोस्रो मतदान गरेका छन् ।

त्यसपछि सभापतिका अर्का उम्मेदवार निधि–कोइराला समुहका रामसरोज यादवले मतदान गरेका छन् । हँसिलो मुद्रामा मतदान गरेका दुवैजना स्वस्थ्य प्रतिस्पर्धाबाट नेतृत्व चयन गरि कांग्रेसलाई एक ढिक्का बनाउने प्रतिवद्वता व्यक्त गरेका छन् ।

मतदानका लागि ४ वटा बुथ बनाइएको छ । एउटा बुथमा २/२ जिल्लाको मत खसाउने वयवस्था मिलाइएको छ । सप्तरी सिरहा, धनुषा महोत्तरी, सर्लाही रौतहट र बारा पर्साको सँगसँगै बुथ बनाइएको छ ।

प्रदेश सभापतिका लागि देउवा समुहबाट रौतहटका जिल्ला सभापति कृष्ण यादव र निधि–कोइराला समूहबाट प्रदेश २ का भौतिक पूर्वाधार विकासमन्त्री रामसरोज यादव चुनावी मैदानमा छन् ।

यस्तै दुई उपसभापतिका लागि ५ जनाबिच प्रतिस्पर्धा छ । देउवा समूहबाट प्रदेश सरकारका महिला, बालबालिका, युवा तथा खेलकुद मन्त्री वीरेन्द्रप्रसाद सिंह र चन्द्रशेखर कुमार यादव तथा निधि–कोइराला समूहबाट धनलाल ठोकर र बिनोदकुमार खनाल चुनावमा होमिएका छन् । उपसभापतिमा रामाधार प्रासद यादव भने स्वतन्त्र उम्मेदवारी दिएका छन् ।

त्यस्तै, दुई महामन्त्रीका लागि ५ जनाको उम्मेदवारी परेको छ । निधि–कोइराला समूहबाट नरेश यादव र हरेश महतो तथा देउवा समुहबाट बृहस्पति कृष्ण श्रेष्ठ र उपेन्द्र कुमार यादवले उम्मेदवारी दिएका हुन् । बिनोद चौधरीले स्वतन्त्र रुपमा उम्मेदवारी दिएका छन् ।
दुई सहमहामन्त्रीका लागि देउवा समूहबाट जयनारायण यादव र परशुराम चौधरी तथा निधि–कोइराला समूहबाट अरविन्द अमात्य र विनोद यादवले उम्मेदवारी दिएका छन् ।

महिलातर्फ १ सहमहामन्त्रीका लागि देउवा समुहबाट रीता यादव उम्मेदवार छन् भने निधि–कोइराला समूहबाट निर्मला सुवेदीले उम्मेदवारी दिएकी छन् । त्यस्तै सहमहमन्त्री खुल्लाबाट २ जनाले स्वतन्त्र उम्मेदवारी दिएका हुन् ।

प्रदेश सदस्य खुल्लामा १४ पदका लागि ५० जना, प्रदेश सदस्य महिला ७ पदका लागि १२ जना, प्रदेश सदस्य खुला प्रत्येक जिल्लाबाट ८ पदका लागि १५ जना, प्रदेश सदस्य प्रत्येक जिल्लाबाट महिला ८ पदका लागि ११ जना, प्रदेश सदस्य खस आर्य १ पदका लागि ४ जना, प्रदेश सदस्य आदिवासी जनजाती खुला १ पदका लागि ३ जना, प्रदेश सदस्य मधेशी खुल्ला ७ पदका लागि १६ जना, प्रदेश सदस्य मधेशी महिला ६ पदका लागि १२ जना, प्रदेश सदस्य दलित खुल्ला ३ पदका लागि १० जना, प्रदेश सदस्य दलित महिला २ पदका लागि ५ जना, प्रदेश सदस्य खुल्ला थारु १ पदका लागि २ जना र प्रदेश सदस्य महिला थारु १ पदका लागि २ जना, प्रदेश सदस्य मुस्लिम खुल्ला २ पदका लागि ५ जना र प्रदेश सदस्य मुस्लिम महिला १ पदका लागि ३ तथा प्रदेश सदस्य अल्पसंख्यक अपांग १ पदका लागि ४ जनाको उम्मेदवारी परेको हो ।