जनकपुरधाम, ७ पुस । जनकपुरधाममा जारी नेपाली काँग्रेसको प्रथम प्रदेश अधिवेशनअन्तर्गत निर्वाचनको प्रचारप्रसारमा सरकारी तथा भारतीय नम्बर प्लेटका गाडीहरुको व्यापक प्रयोग भईरहेको देखिएको छ ।

प्रदेश अधिवेशनका उम्मेदवार तथा नेता कार्यकर्ताहरुले चुनाव प्रचारप्रसारमा सरकारी तथा भारतीय गाडीको व्यापक प्रयोग गरेका हुन् ।

नेपाली काँग्रेसको मंगलबारदेखि जारी अधिवेशनमा जनकपुरधाममा भारतीय गाडीहरु निर्वाध रुपमा सञ्चालनमा देखिएका छन् । त्यस्ता सवारी साधनमा पार्टीको झण्डासमेत राखेर गुडाउने गरिएको पाइएको छ । यस्ता सवारी खुलमखुला नगरभित्र निर्वाध गुडिरहँदा पनि यसको नियमन गर्ने निकाय भने मौन देखिएको छ ।

आर्थिक ऐन, ०६५ मा एउटै चेचिस नम्बर र नम्बर प्लेटका गाडी एक वर्षमा पटक–पटक वा एकमुष्ट गरी जम्मा २९ दिन मात्र अस्थायी पैठारी गराई चलाउन पाउने प्रावधान छ ।

भारतीय सीमासँग जोडिएका जिल्लाका कतिपय उम्मेदवारका आफन्त भारतका बिभिन्न गाउँहरुमा बस्छन् । त्यही भएर उनीहरूका नाममा दर्ता रहेका गाडीको प्रयोग बढेको हुनसक्ने स्थानीय दिलिप साहले भने ।

नियमन गर्ने निकाय राजस्व अनुसन्धान इकाई कार्यालय, प्रहरी, भन्सार र स्थानीय प्रशासन हुन् । यी निकायले देखेर पनि नदेखेझैं गरेको नेपाल पत्रकार महासंघ धनुषाका उपाध्यक्ष अवधेश कामतले बताए । उनले बिना अवरोध निर्वाध रुपमा कुनै पार्टी विशेषको निर्वाचन प्रचार प्रसारमा भारतीय नम्बर प्लेटका गाडी प्रयोगमा आउनु दुःखद रहेको बताए ।

यता, प्रदेश २ सरकारका दुईजना मन्त्री र केही प्रदेश सांसदहरुसमेत निर्वाचनमा उम्मेदवार रहेकाले सरकारले उनीहरुका लागि उपलब्ध गराएको सरकारी सवारी साधनहरु पनि निर्वाचन प्रचार प्रसारमा प्रयोग भईरहेको देखिएको छ । नेपाली काँग्रेसका मन्त्री र सांसदलाई सरकारले उपलब्ध गराएको सवारी साधन अहिले कार्यकर्ता ओसार्ने प्रमुख साधन बनेको छ ।

प्रदेश उपसभापतिका उम्मेदवार महिला, बालबालिका, युवा तथा खेलकुद मन्त्री वीरेन्द्र प्रसाद सिंहले आफूले प्रयोग गरिरहेको सरकारी गाडीमै निर्वाचन प्रचार प्रसार तथा कार्यकर्ता ओसार्न प्रयोग गरिरहेको देखिएको छ ।