जनकपुरधाम, ७ पुस । नेपाली काँग्रेस प्रदेश २ को नयाँ नेतृत्वका लागि आज भईरहेको मतदानमा उम्मेदवारहरु एकअर्कासँग मत माग्नमा व्यस्त देखिएका छन् । प्रदेश २ को सभापति पदका उम्मेदवारहरु समेत एकअर्कासँग मत माग्न व्यस्त देखिएका हुन् ।

सभापति पदका लागि प्रदेश २ का भौतिक पूर्वाधार विकासमन्त्री रामसरोज यादव र रौतहट जिल्ला सभापति कृष्ण प्रसाद यादवले उम्मेदवारी दिएका हुन् । उनीहरु दुबैजना गोपाल धर्मशालास्थित मतदान केन्द्रमा मतदाताहरुसँग मत माग्दै थिए । सोही क्रममा दूबै जनाको मतदान केन्द्रमा जम्का भेट भयो ।

यी दुई बिच जम्काभेट भएपछि दूबैजनाले एक अर्कासँग मत माग्न चुकेनन् । दूबैले अंकमाल गर्दै सहयोग गर्न आग्रह गरे ।

सभापतिका उम्मेदवार कृष्णले अर्का सभापतिका उम्मेदवार रामसरोज यादवलाई आफू तपाईंको कान्छो भाई रहेकाले सहयोग गर्न आग्रह गरे । रामसरोजले समेत उनलाई तपाईंको जेठो भाई रहेकाले मलाई सहयोग गर्नुस भन्दै आग्रह गरेका थिए ।

दूबै जना कांग्रेसी रहेकाले आफूहरुको कांग्रेसलाई बलियो बनाउने ध्येय मात्रै रहेको रामसरोजले प्रतिक्रिया दिए । उनले चुनावको परिणाम जे भएपनि संगै अगाडी बढ्ने प्रतिवद्धता व्यक्त गरे ।