जनकपुरधाम, ६ पुस । नेपाली काँग्रेसका नेता एवं प्रजातान्त्रिक आन्दोलनका अगुवा रामनारायण मिश्रको ५४औं पुण्यतिथिको अवसरमा मंगलबार जनकपुरधाममा श्रद्धाञ्जली एवं प्रार्थनासभाको आयोजना गरिएको छ ।

रामनारायण मिश्र स्मारक समितिको आयोजनामा भजन किर्तनका साथै प्रार्थनासभा गरेर श्रद्धाञ्जली अर्पण गरिएको हो ।

जनकपुरधामको प्रसिद्ध गंगासागर पोखरीको पुर्वी डीलस्थित मिश्रको अन्तिम संस्कार स्थलमा आयोजित प्रार्थनासभामा नेपाली काँग्रेसका नेता तथा कार्यकर्ताहरुको बाक्लो उपस्थिति रहेको थियो ।

स्व. मिश्र राणाकालीन निरंकुश जहाँनिया शासनको विरुद्धमा २००४ सालदेखि नै लोकसेवक संघको माध्यमबाट विभिन्न रचनात्मक क्रियाकलापहरु गर्दै जनचेतना जगाउने गर्थे । नेपाली काँग्रेसद्वारा सञ्चालित २००७ सालको सशस्त्र क्रान्तिमा समेत उनको सहभागिता रहेको थियो ।

२०१५ साल फागुन ७ गते भएको संसदीय आमनिर्वाचनमा प्रतिनिधिसभा सदस्य पदमा निर्वाचित भएर विशेश्वर प्रसाद कोइरालाको नेतृत्वमा २०१६ साल जेठ १३ गते गठित मन्त्रिमण्डलमा समेत उनी उद्योग वाणिज्य मन्त्री बनेका थिए । जनकपुरमा चुरोट कारखाना र वीरगञ्जमा चिनी मिलको स्थापनामा उनकै योगदान छ ।

मिश्रका छोरा प्रदेश २ प्रमुख हरिशंकर मिश्रको प्रमुख आतिथ्यमा भएको श्रद्धाञ्जली सभामा नेपाली काँग्रेसका नेता एवं पूर्व उपप्रधानमन्त्री बिमलेन्द्र निधि, गृहमन्त्री बालकृष्ण खाँण, प्रदेश २ का भौतिक पूर्वाधार विकासमन्त्री रामसरोज यादव लगायतका नेताहरुको उपस्थिति रहेको थियो ।