जनकपुरधाम, ६ पुस । गृहमन्त्री बालकृष्ण खाँणले एमसीसी परियोजनालाई अगाडी बढाउने नेपाल सरकारको दायित्व रहेको बताएका छन् ।

नेपाली काँग्रेस प्रदेश २ को अधिवेशनलाई केन्द्रित गरेर जनकपुरधाम आईपुगेका गृहमन्त्री खाँणले संचारकर्मीहरुसँग कुरकानी गर्दै एमसीसीको बारेमा जनतामा केही भ्रम रहेको बताए ।

उनले भने,‘अमेरिकी सरकारले एमसीसीको माध्यमबाट मुख्यतः गरिबी निवारण र रोजगारीसंग सम्बन्धित परियोजना सञ्चालन गरिरहेको छ, यसको अरु कुनै उद्देश्य छैन ।’

यसअघिका सरकारहरुकै पालामा यो परियोजनाका लागि प्रक्रियाहरु अगाडी बढाइएको र नेपालको विकासका लागि परियोजनासँग नेपाल सरकारले सम्झौता गरेकाले एमसीसी परियोजनालाई अगाडी बढाउनु सरकारको दायित्व रहेको खाँणले बताए ।

नेपाल सरकारलाई परियोजनाले विद्युतीकरण र विद्युतीकरणको परियोजना तथा सडक निर्माण परियोजनाका लागि निःशर्त अनुदान दिन लागेको जानकारी गराए । उनले भने, ‘एमसीसीको परियोजना कुनै ऋणमा होइन, यो निःशर्त अनुदान हो, गठबन्धनका दलहरुको सहमतिकै आधारमा यो पारित हुन्छ ।’

खाँणले कुनै पनि प्रस्ताव अगाडी बढाउनुभन्दा पहिले सहमति र सहकार्य आवश्यक रहेकाले सरकार यसको तयारीमा लागेको समेत बताए ।