सर्लाही, ४ पुस । नेकपा माओवादी केन्द्र प्रदेश २ को अधिवेशन सम्पन्न भएको छ ।

सर्लाहीको लालबन्दीमा शनिबारदेखि चलेको बन्दसत्रमा २७१ सदस्यीय समिति गठन गर्ने र पुस २० मा घोषणा सभा गर्ने निर्णय गर्दै अधिवेशन सम्पन्न भएको हो ।

आइतबार लालबन्दीमा सम्पन्न बन्दसत्रबाट २७१ जनालाई ७ वटै जिल्लामा बाँडफाँड गरिएको छ भने जिल्लामा रहेका केन्द्रीय सदस्य तथा प्रदेश २ समितिका सदस्यहरु मिलेर कार्यसमितिमा नाम सिफारिससंगै समिति गठन गरिने भएको छ ।

नेतृत्व चयन गर्ने विषयमा कुरा मिल्न नसक्दा पदाधिकारी सहित सदस्य चयन गर्न समेत माओवादी केन्द्र प्रदेश समिति असफल भएको छ । प्रायः जिल्लाबाट बन्दसत्रमा अत्याधिक प्रतिनिधि आएको भन्दै शनिबार अधिवेशनको बन्दसत्र स्थगित गरिएको थियो ।

प्रदेश अध्यक्षका आकांक्षीहरु धेरै भएकोले अधिवेशनको बन्दसत्रबाट सर्वसम्मतरुपमा चयन गर्न नसकिएको प्रदेश सांसद समेत रहेका जगतप्रसाद यादवले जानकारी दिए ।

पुस ११ गते हुने माओवादी केन्द्रको राष्ट्रिय सम्मेलनअघि प्रदेश २ को विवाद समाधान हुने सम्भावना नदेखिएपछि प्रदेश २ का ८ वटै जिल्लालाई १७ देखि २२ जना प्रतिनिधिको नाम सिफारिस गर्न र जिल्लाले सर्वसम्मतरुपमा सिफारिस गरेका नेताहरुको नामावली अनुसार पुस २० मा घोषणा सभा आयोजना गरी प्रदेश समितिको २७१ सदस्यीय पदाधिकारीसहित सर्वसम्मतले चयन गरिने नेता यादवले बताए ।

प्रदेश अध्यक्षका लागि रामकुमार शर्मा, श्रवण यादव, अशोक साह, अजय शंकर नायक र दिलिप साहलगायतकाहरु आकांक्षी छन् ।अध्यक्षमा यसमध्ये एकजनामा सहमति बनाउन प्रयास भएको थियो ।