–विनय यादव
सिरहा, ४ पुस । पूर्वपश्चिम राजमार्ग अन्तर्गत गोलबजारमा स्थनीयले आइतार चक्काजाम गरेका थिए ।

शनिबार छुरा हानेर हत्या गरिएका गोलबजार नगरपालिका–६ का रामकुमार सदाको हत्यारालाई प्रहरीले अहिलेसम्म नसमातेको भन्दै आफन्त तथा स्थानीयबासीले चक्काजाम गरेका थिए ।

शनिबार दुई समूहबीच विवाद भएपछि छुरा हानाहान भएको थियो । छुरा प्रहारबाट २६ वर्षीय रामकुमारको ज्यान जानुको साथै सोही ठाउँका १९ वर्षीय निकेश सदा गम्भीर घाइते भएका थिए । उनको आरके मेडिसिटी अस्पतालमा उपचार भइरहेको प्रहरीले जनाएको छ ।

बिहानैदेखि अवरुद्ध रहेको राजमार्ग स्थानीय प्रशासन र पीडित परिवारबीच २४ घण्टाभित्र संलग्नलाई समात्ने, घाइतेलाई उपचारको व्यवस्था गर्ने र पीडित परिवारलाई कानुन बमोजिम क्षतिपूर्ति दिलाउन सिफारिस गर्नेलगायतका ३ बुँदे सहमति भएपछि १० बजे मात्रै खुलेको थियो ।