सर्लाही, ४ पुस । सर्लाहीबाट नेपाली नक्कली नोटसहित २ भारतीय नागरिक पक्राउ परेका छन् ।

पक्राउ पर्नेमा भारत बिहारको सितामढी थाना सोनवर्षा ग्राम सोनवर्षा वडा नम्बर–६ चिलरी टोलका ३७ वर्षीय आशिष भन्ने सुरेन्द्र महतो र वडा नम्बर–१ का ४८ वर्षीय प्रमोद कुमार रहेका छन् ।

जिल्ला प्रहरी कार्यालय सर्लाहीका प्रवक्ता प्रहरी नायव उपरीक्षक माधव प्रसाद वुढाथोकीले नेपाल प्रहरी र सशस्त्र प्रहरीको संयुक्त टोलीले सर्लाहीको मलंगवा नगरपालिका वडा नम्बर–८ गोरखकाली स्थित भन्सार कार्यालय अगाडी चेकप्वाईन्ट थापी चेकजाँच गर्ने क्रममा दुवैजनालाई पक्राउ गरेको हो ।

पक्राउ परेका दुवैजनाको मोटरसाईकल तलासी गर्दा मोटरसाइकलको डिक्की र सिटको बिचको भागबाट नक्कली जस्तो देखिने एक हजारको ११५ वटा नेपाली नोट, ४७ हजार ५१० भारतीय रुपैयाँ र १७० नेपाली रुपैयाँ बरामद भएको जिल्ला प्रहरी कार्यालय सर्लाहीले जनाएको छ ।

पक्राउ परेका दुबैजनामाथि थप अनुसन्धान भईरहेको प्रहरीले जनाएको छ ।