महोत्तरी, ३ पुस । महोत्तरीमा कोरोनाविरुद्धको खोप अभियानलाई तीव्र बनाइएको छ ।

महोत्तरीमा १२ देखि १७ वर्ष उमेरका बालबालिका तथा किशोर किशोरीलाई ७ देखि ११ पुससम्म खोप लगाइने बताइएको छ ।

जिल्ला स्वास्थ्य कार्यालयका प्रमुख भोला यादवका अनुसार सामुदायिक विद्यालयमै पुगेर विद्यार्थीलाई खोप लगाइनेछ । त्यसका लागि मोर्डना खोप आइसकेको उनले बताए । ६ देखि ११ पुससम्म बर्दिबास, गौशाला, भंगहा, रामगोपालपुर, औरही, सम्सी र सोनमालगायतका पालिकाहरुमा खोप अभियान सञ्चालन गरिनेछ ।

जलेश्वर, पिपरा, लोहारपट्टी, मटीहानी, मनरासिस्वा,बल्वा र एकडारामा भने १४ देखि १८ पुससम्म सामुदायिक विद्यालयका विद्यार्थीलाई खोप लगाइने छ ।

खोप लगाउन छुटेका तथा दोस्रो मात्रा लगाउन बाँकीले पनि खोप लगाउन पाउने उनले जानकारी दिए । महोत्तरीको कुल जनसंख्याको झण्डै ६५ प्रतिशतले खोप लगाइसकेका छन् ।