सप्तरी, २ पुस । माग गरेको सूचना नपाएपछि उपाध्यक्षले आफ्नै गाउँपालिका कार्यालयमा तालाबन्दी गरेकी छन् ।

सूचना नदिएको भन्दै सप्तरीको तिलाठी कोइलाडी गाउँपालिकाका प्रशासकीय अधिकृतको कार्यकक्षमा उपाध्यक्ष सुचिता कुमारी यादवले तालाबन्दी गरेकी हुन् । तालाबन्दीसहित उपाध्यक्षले धर्ना समेत जारी राखेकी छन् ।

उपाध्यक्ष यादवले आर्थिक वर्ष २०७८÷०८९ को राजश्व परामर्श समितिको बैठकको निर्णयको प्रतिलिपी, स्रोत अनुमान तथा बजेट सिमा निर्धारण समितिको निर्णय प्रतिलिपी, बजेट तथा कार्यक्रम योजना तर्जुमा समितिको बैठकको प्रतिलिपी, गाउँपालिकाबाट वडाहरुमा पठाएको बजेट सिलिङको पत्र र वडाहरुबाट प्राप्त बजेट सिलिङको प्रतिलिपी, गाउँसभाको निर्णय सहितको प्रमाणित प्रतिलिपी लगायत उपलब्ध गराउनु पर्ने माग गरेकी छन् ।

यसअघि पटक पटक सूचनाको हक सम्बन्धि विभिन्न निर्णयहरुको प्रतिलिपी माग गर्दा पनि गाउँपालिकाका अध्यक्ष सतिश सिंह र प्रशासकीय अधिकृत झाले कुनै चासो नदेखाएपछि बाध्य भएर तालाबन्दी गर्नु परेको उपाध्यक्ष यादवको भनाइ छ ।