काठमाडौं, २७ मंसिर । नेपाली कांग्रेसको जारी १४ औं महाधिवेशनको सुरक्षाका लागि प्रहरीले नेपाल पुलिस क्लबमा ‘ज्वाइन्ट कमाण्ड पोस्ट’ स्थापना गरेको छ ।

सिसिटिभीसमेत जडान गरेर प्रहरीले महाधिवेशनका लागि कमाण्ड पोस्ट स्थापना गरेको हो ।

महानगरीय प्रहरी परिसरका अनुसार नेपाल प्रहरी, सशस्त्र प्रहरीसहित जिल्ला प्रशासनको सूक्ष्म निगरानी हुने गरी पोस्ट स्थापना गरिएको छ ।

ज्वाइन्ट कमाण्ड पोस्टबाट काठमाडौंका प्रमुख जिल्ला अधिकारी गोविन्दप्रसाद रिजाल, महानगरीय प्रहरी कार्यालयका प्रमुख प्रहरी अतिरिक्त महानिरीक्षक हरिबहादुर पाल, काठमाडौंका एसएसपी अशोक सिंह, सशस्त्र प्रहरीका अधिकृतहरूले महाधिवेशनको निगरानी गर्नेछन् ।

महाधिवेशन क्षेत्रभर ३२ वटा सिसिटिभी राखिएको छ, त्यसको निगरानी पोस्टबाट हुने काठमाडौं परिसर प्रवक्ता प्रहरी उपरीक्षक दिनेशराज मैनालीले बताए ।

मतदानस्थल बाहिरसम्मको गतिविधि निगरानी, शान्ति सुरक्षा र उच्छृंखल गतिविधि हुन नदिन सुरक्षा व्यवस्था मिलाइएको मैनालीले जानकारी दिए ।

भित्र कुनै गैरकानुनी गतिविधि भए त्यहाँको प्रहरीलाई तुरून्त पोस्टले खबर गर्नेछ ।