महोत्तरी, १६ मंसिर । नेपाली कांग्रेस महोत्तरी–३ को अधिवेशनमा झडप भएको बताइएको छ । जारी क्षेत्रीय अधिवेशनको बन्दसत्रमा दुई पक्षबीच झडप भएको हो ।

संस्थापन इतरका विमलेन्द्र निधि र रामचन्द्र पौडेल प्यानलबीच भएको विवाद र अडानले झडप भएको बन्दसत्रमा सहभागीहरूले बताएका छन् ।

महोत्तरी–३ बाट मनोज झा, राघवेन्द्र झा र रामु यादव सभापतिको आकांक्षी छन् । मनोज झा र रामु यादव विमलेन्द्र निधिनिकट मानिन्छन् भने राघवेन्द्र रामचन्द्र पौडेल निकट हुन् ।

कांग्रेसका पूर्व केन्द्रीय सदस्य रामचन्द्र तिवारीका कारण झडप भएको निधि निकट नेताहरूले आरोप लगाएका छन् । राघवेन्द्रलाई सभापति बनाउने विवादले समस्या सिर्जना भएको कांग्रेस महोत्तरीका सचिव शम्भु पाठकले बताए ।

तिवारीले चुनावभन्दा पनि राघवेन्द्रलाई सर्वसम्मत सभापति बनाउनु पर्ने अडान राखेको तर विमलेन्द्रनिकट नेताहरूले अस्वीकार गरेपछि तिवारी पक्षले टोले गुण्डा परिचालन गरेको उनको आरोप छ ।

मनरासिस्वा नगरपालिका–८ मा बाँकी रहेको वडा अधिवेशन पनि तिवारी पक्षकै कारण अगाडि बढ्न नसकेको निधि पक्षको आरोप छ । ’तिवारी तथा पौडेल समूहले वडामा चुनावको तयारी हुँदै गर्दा फर्जी मतदाता ल्याएर निर्वाचन भाड्न खोजेको आरोप छ,’ क्षेत्र नम्बर ३ का उपसभापति विजय साहले भने ।

बन्दसत्रमा भएको झडपमा नेता रामु यादव सामान्य घाइते भएका छन् । तिवारी पक्षले बन्दसत्रमा नै गुण्डा परिचालन गरेपछि निधि समूह छलफल नै नगरी बाहिरिएको साहको भनाइ छ ।