विराटनगर, १० मंसिर । उपचार वापतको रकम तिर्न नसक्दा एक युवकले आत्महत्या गरेका छन् ।

विराटनगरस्थित गोल्डेन अस्पतालको बन्धक बनेका मोरङको धनपालथान गाउँपालिका वडा नम्बर–१ बस्ने ३५ वर्षीय शिवकुमार मण्डलले आत्महत्या गरेका हुन् ।

मण्डलले शुक्रबार बिहान ६ बजे सोही अस्पतालको तीन तलामाथिबाट हामफालेर आत्महत्याको प्रयास गरेका थिए । अस्पतालबाट हामफालेर गम्भीर घाइते भएका मण्डलको सोही अस्पतालमा उपचारको क्रममा मृत्यु भएको प्रहरीले जनाएको छ ।

जिल्ला प्रहरी कार्यालय मोरङका प्रवक्ता प्रहरी नायव उपरीक्षक दीपक श्रेष्ठका अनुसार छारे रोगको पुरानै समस्या रहेका मण्डललाई उपचारका लागि मंसिर ३ गते परिवारजनले अस्पतालमा भर्ना गरेका थिए ।

आइसियुमा राखेर उनको उपचार भईरहेको थियो । अस्पतालले मण्डललाई मंसिर ७ गते डिस्चार्ज गरेको थियो । तर उपचार वापतको १९ हजार रूपैयाँ तिर्न नसक्दा परिवारका सदस्यले घर लैजान पाइरहेका थिएनन् ।

उपचारमा लागेको मध्ये १७ हजार रूपैयाँ मात्रै परिवारले तिर्न सकेपछि मण्डललाई अस्पतालले बन्धक बनाएर राखेको परिवारजनको दाबी छ ।