काठमाडौं, १० मंसिर । नेपालको जनसंख्या २ करोड ८० लाख देखि ३ करोडको बीचमा मात्र रहने अनुमान गरिएको छ । केन्द्रिय तथ्यांक विभागले कार्तिक २५ देखि मंसिर ९ गतेसम्म गरेको जनगणनाअनुसार यस्तो प्रारिम्भक विश्लेषण गरिएको हो ।

विभागले गरेको जनगणनामा नेपाली महिलाले औषतमा दुई सन्तान जन्माउने गरेको पाइएको छ । नेपाली महिलाको सन्तान उत्पादन दर घट्दो क्रममा रहेको देखिएको छ । नेपालमा जनसंख्या वृद्धिदर अपेक्षा गरे अनुसार नहुने विभागले जनाएको छ ।

२०६८ सालको प्रक्षेपण अनुसार २०७८ सालसम्म एक महिलाबाट औसतमा २.१ जना सन्तान जन्मनुपर्ने थियो । तर, जनगणनाबाट औसत २ जना मात्र सन्तान जन्मने गरेको देखिएको बिभागका महानिर्देशक नेबिनलाल श्रेष्ठले जानकारी दिए ।

उनका अनुसार सन्तान उत्पादन दर प्रदेश नम्बर २, कर्णाली र सुदुरपश्चिममा औसतभन्दा धेरै र बागमतीमा औसत भन्दा कम रहेको पाइएको छ । बागमतीमा औसत एक महिलाबाट १.४ जना सन्तान जन्मिएका छन् ।

जनसंख्याको प्रारम्भिक नतिजा तीन महिनामा प्राप्त हुनेछ भने पुरै नतिजा आउन दुई वर्ष लाग्ने भएको छ ।