जनकपुरधाम, ७ मंसिर । जनकपुरधाम उपमहानगरपालिका कर्मचारीहरु कामकाज ठप्प पारेर आन्दोलनमा उत्रेका छन् ।

केही वडाध्यक्षले सरसफाइ कर्मचारीलाई दुर्व्यवहार गरेको भन्दै उनीहरु आन्दोलित भएका हुन् ।

सोमबार जनकपुरधाम उपमहानगरपालिका वडा नम्बर–३, ४ र ७ का वडाध्यक्षहरु दिपेन्द्रकुमार साह, सुदर्शन सिंह र जानकीराम साहले सरसफाइ कर्मचारीलाई दुर्व्यवहार गरेको भन्दै उनीहरूले मंगलबार विरोध जुलुस प्रदर्शन गरेका छन् ।

उपमहानगरका कर्मचारीहरुले धनुषाका प्रमुख जिल्ला अधिकारी बन्धुप्रसाद बास्तोलालाई ज्ञापनपत्रसमेत बुझाएका छन् । वडाध्यक्षहरूले पटक–पटक कर्मचारीहरूमाथि दुर्व्यवहार गरेको भन्दै कारबाहीको माग गर्दै उनीहरूले ज्ञापनपत्र बुझाएका हुन् ।

यता, सरसफाइ कर्मचारीले वडा नम्बर–४ का वडाध्यक्ष सुदर्शन सिंहसँग दुर्व्यवहार गरेको भन्दै वडाध्यक्षहरूले सोमबार नगरप्रमुख लालकिशोर साहको कार्यकक्षमा तालाबन्दी गरेका थिए ।