जनकपुरधाम, ३ मंसिर । मुख्यमन्त्री लालबाबु राउत नेतृत्वको प्रदेश २ सरकार थप विस्तार हुन लागेको छ ।

नेकपा एकीकृत समाजवादी पार्टीले सरकारमा सहभागी हुने मन्त्रीको नाम टुंग्यासँगै मन्त्रिपरिषद् विस्तार हुन लागेको हो ।

नेकपा (एस) प्रदेश २ संसदीय दलका नेता शत्रुधन महतो र सांसद प्रमोद यादवको नेतृत्वमा सरकारमा सहभागी हुन लागेको पार्टीका प्रदेश इन्चार्ज धर्मनाथ साहले जानकारी दिए ।

मुख्यमन्त्री राउतले एकीकृत समाजवादीलाई सरकारमा ल्याउन आफ्नै पार्टीका उद्योग, पर्यटन, वन तथा वातावरण मन्त्री रामनरेश राय यादवलाई दुई दिनअघि मात्र पदमुक्त गरेका थिए ।

एकीकृत समाजवादीलाई उद्योग, पर्यटन, वन तथा वातावरणसहित मुख्यमन्त्री राउतले आफ्नो मातहतमा राखेको कानुन, न्याय तथा प्रदेश सभा मामिला मन्त्रालय दिने सरकारको तयारी छ ।

एकीकृत समाजवादीले उद्योग, पर्यटन, वन तथा वातावरण मन्त्रालयको जिम्मेवारी शत्रुधन महतो र कानुन, न्याय तथा प्रदेश सभा मामिला मन्त्रालयको जिम्मेवारी प्रमोद यादवलाई दिन लागेको छ ।

मुख्यमन्त्री राउतले कानुन, न्याय तथा प्रदेश सभा मामिला र बाणिज्य आपूर्ती तथा विज्ञान प्रविधि मन्त्रालय आफ्नै मातहतमा राखेका थिए । तत्कालिन राजपाबाट सरकारमा सहभागी भएका मन्त्रीहरुलाई हटाएपछि राउतले प्रदेशका ६ मन्त्रालयलाई टुक्रयाएर १० मन्त्रालय बनाएका थिए ।

इन्चार्ज साहले दुवै मन्त्रीको सपथग्रहण आइतबार दिउँसो २ बजेका लागि निर्धारण गरिएको जानकारी दिए ।