जनकपुरधाम, २९ कार्तिक । धनुषाको हंसपुर नगरपालिकाका प्रमुख प्रशासकीय अधिकृत केशव कुमार अधिकारीले नगरप्रमुख रामज्ञान मण्डलले आफूमाथि दुव्र्यवहार गरेको आरोप लगाएका छन् ।

कर्मचारी खटनपटनमा जनप्रतिनिधिलाई वेवास्ता गरेपछि नगरप्रमुख मण्डलले आफूमाथि दुव्र्यवहार गरेको प्रमुख प्रशासकीय अधिकृत अधिकारीको आरोप छ । मेयर मण्डलले आफुलाई दुव्र्यवहार गर्दै ज्यानमार्ने धम्की समेत दिएको उनको दावी छ ।

नगरपालिकाको विभिन्न शाखामा कर्मचारी भर्ना गर्दा आफुलाई किन नसोधेको भन्दै मेयर मण्डललगायत उनका केही आसेपासेले आफूलाई गालीगलौज गर्नुका साथै कुटपिट समेत गर्न खोजेको प्रमुख प्रशासकिय अधिकृत अधिकारीले आरोप लगाएका छन ।

आइतबार कार्यालय पुग्दा मेयरले आफ्नो कार्यकक्षमा बोलाएर गालीगलौज गर्दै धम्की दिएको उनले बताए । उनले भने,‘म यहाँ साउन महिनामा हाजिरी भएर आएँ, तर, मलाई उनले सुरुमा हाजिर समेत गर्न दिनु भएन् । पछि अदालतको आदेश आउँदा मात्र हाजिर हुन दिए । त्यसैबेलादेखि कार्यालयको काम कारवाहीमा उनले धेरै वाधा अवरोधहरु गर्दै आएका छन् ।’

प्रशासन शाखा, योजना र जिन्सी शाखामा नयाँ कर्मचारी भर्ना गरेको बिषयलाई लिएर समस्या उत्पन्न भएको उनको दावी छ । मेयर मण्डलका आसेपासे ललन यादव र सुजीत कापड़ी भन्ने व्यक्तिले आफूमाथि दुव्र्यवहार गरेको भन्दै अधिकारीले इलाका प्रहरी कार्यालय तारापट्टी र अस्थायी प्रहरी पोस्ट बेल्हिमा उजुरी समेत दिएका छन् ।

यस सम्बन्धमा मेयर मण्डलले प्रमुख प्रशासकीय अधिकृत अधिकारीलाई आफूले कुनै प्रकारको धम्की नदिएको दावी गरेका छन् । उनले भने,‘एउटा निर्वाचित जनप्रतिनिधिलाई वेवास्ता गर्दै प्रमुख प्रशासकीय अधिकृत अधिकारीले आफुखुशी निर्णयहरु गर्न थालेपछि मैले सामान्य हस्तक्षेप मात्र गरेको हुँ ।’

मेयर मण्डल र प्रमुख प्रशासकिय अधिकृत अधिकारी बिचको आपसी विवादका कारण अहिले पालिकाको कामकाज प्रभावित भएको छ ।