एजेन्सी, २९ कार्तिक । बेलायत सरकारले कोरोनाविरुद्धको खोपलाई तीव्रता दिएसँगै त्यहाँ हालसम्म १० करोड ९१ लाख ७९ हजार ७८४ डोज खोप वितरण भईसकेको ‘डिपार्टमेन्ट अफ हेल्थ एण्ड सोशल केयर’ को तथ्याङ्कमा उल्लेख रहेको छ ।

कोरोनाविरुद्धको खोपको प्रसङ्गमा बेलायत विश्वमै अग्रस्थानमा रहेको छ, चाहे खोपलाई मान्यता दिने विषयमा होस् वा खोप वितरण सुरु गर्ने प्रसङ्गमा नै किन नहोस् ।

बेलायतमा अहिले झन्डै २२ प्रतिशतले कोरोनाविरुद्धको खोपको तेस्रो अर्थात् बुष्टर डोज लगाइसकेको सरकारी तथ्याङ्कमा उल्लेख छ ।आइतबारसम्मको तथ्याङ्क अनुसार त्यहाँ १ करोड २६ लाख १३ हजार २५६ जनाले उक्त बुष्टर डोज लिइसकेका छन् ।

पछिल्लो २४ घण्टामा झन्डै साढे ४ लाख जनाले बुष्टर डोज लगाएका छन् । यसैगरी ५ करोड ५ लाख ५७ हजार ६५ जना अर्थात् ८७.९ प्रतिशतले खोपको पहिलो डोज र ४ करोड ६० लाख ९ हजार ४६३ जना अर्थात् ८० प्रतिशतले खोपको दुवै डोज लगाइसकेको तथ्याङ्कमा उल्लेख छ ।

तर, त्यहाँ खोप नलागाउनेको सङ्ख्या पनि उत्तिकै रहेको बताइएको छ ।