जनकपुरधाम, १२ कार्तिक । धनुषाको सबैला नगरपालिकास्थित एक विद्यालयका प्रधानाध्यापकलाई जनकारबाही भन्दै कालोमोसो दलिएको छ ।

शुक्रबार धनुषाको रघुनाथपुरस्थित फकिर चन्द उच्च माध्यमिक विद्यालय बरकुर्वाका प्रधानाध्यापक वैजु साहलाई विद्यार्थीहरुले दुव्र्यवहार सहित कालोमोसो दलेका हुन् ।

मोटरसाइकलमा सवार भई विद्यालय गईरहेको अवस्थामा विद्यार्थीहरुले उनलाई रोकेर कालोमोसो सहित चप्पलले समेत हिर्काएको बताइएको छ ।

विद्यार्थीहरु विगत चार दिनदेखि विभिन्न पाँच सुत्रीय विभिन्न माग राख्दै आन्दोलनमा रहेका छन् ।

उनीहरुले विद्यालयमा नियमित पठनपाठन हुनु पर्ने, शिक्षकको व्यवस्थापन हुनु पर्ने, विभिन्न शुल्कको नाममा लिइएको रकमको विल विद्यार्थीहरुले पाउनु पर्ने, कक्षा ११ र १२ का विद्यार्थीहरुले पुस्तक पाउनु पर्ने, विद्यालयका नाममा आएका सामग्रीहरु विद्यालयमा राख्नु पर्ने, विद्यालय सुधारका लागि सरोकारबालाहरुको बृहत भेला गरी अन्य विषयहरुमा निर्णय लिनु पर्नेलगायतका माग राखेर आन्दोलन गरिरहेका छन् ।

प्रधानाध्यापक साहलाई कालोमोसो दल्नेमा जनमत पार्टीको विद्यार्थीहरुको समेत संलग्नता रहेको भनिएपनि औपचारिकरुपमा भने यसको जिम्मेवारी कसैले लिएका छैनन् ।