जनकपुरधाम, १० कार्तिक । नेपाली काँग्रेसको भातृ संगठन नेपाल तरुण दलले आफ्नो स्थापना दिवसका अवसरमा गरिव तथा असहायहरुलाई कपडा वितरण गरेको छ ।

तरुण दल धनुषाले ६८औं स्थापना दिवसका अवसरमा बुधवार जनकपुरधाम–७ स्थित कुष्ठारोगीहरुको संस्था जमिरीया देवी धर्मशालामा रहेका महिला, बालबालिका तथा बृद्धबृद्धाहरुलाई कपडा वितरण गरेको हो ।

धर्मशालामै गएर आयोजना गरिएको कार्यक्रममा ४६ जनालाई कपडा बाँडिएको तरुण दल धनुषाका उपाध्यक्ष राकेश विक्रम साहले बताए ।

नजिँकिदैं गएको पर्व दीपावली तथा छठलाई मध्यनजर गर्दै सो धर्मशालामा बस्नेहरुलाई नयाँ लुगा वितरण गरि तरुण दल धनुषाद्वारा स्थापना दिवस मनाइएको साहले जानकारी दिए ।

तरुण दल धनुषाका अध्यक्ष संजय लाभ कर्णको अध्यक्षतामा आयोजित कार्यक्रममा बोल्दै लाभले जेष्ठ नागरिक तथा कुष्ठरोगीहरुको सेवामा सबैको हातेमालो आवश्यक रहेको बताए । उनले मानवीय सहयोगले सन्तुष्टिसँगै समुन्नत समाज निर्माणमा मद्दत पुग्ने समेत उल्लेख गरे ।

कार्यक्रममा महिला संघ धनुषाका सभापति तुलसा आचार्य, नेविसंघका सभापति सुजित यादव, युवा नेता लभकुमार झा, अखिल मढिकर्मी, राजु साह, अजय गुप्ता, भरत साहलगायत विभिन्न तहका तरुण र विद्यार्थी नेताहरुको उपस्थिति रहेको थियो ।