काठमाडौं, १० कार्तिक । साग स्वर्णधारी नेपाली मुक्केबाज भुपेन्द्र थापामगर आइबा पुरुष विश्व बक्सिङ च्याम्पियनसिपको पहिलो खेलमै पराजित हुँदै बाहिरिएका छन् ।

सर्बियाको बेलग्रेडमा सुरु भएको च्याम्पियनसिप अन्तर्गत मंगलबार भएको ६३.५ केजी तौल समूहमा भुपेन्द्र फ्रान्सेली खेलाडी हामराबीसँग ५–० ले पराजित भएका हुन् । पहिलो चरण अन्तर्गतको खेल तेस्रो राउन्डसम्म चलेको थियो ।

त्यसअघि सोमबार ६७ केजी तौल समूहमा इराकी खेलाडीबाट वाकओभर पाउँदै १३औं सागका स्वर्णधारी सनिल शाही अन्तिम ३२ मा पुगेका थिए । सनिलले बिहीबार आयोजक सर्बियाका खेलाडीसँग अन्तिम १६ प्रवेशका लागि प्रतिस्पर्धा गर्नेछन् ।

कात्तिक २० गते सम्म हुने प्रतियोगितामा भूपेन्द्र र सनिलसहित ४ नेपाली खेलाडीको सहभागिता छ । पुरन राईले ५७ केजीमा र रविन थापाले ४८ केजी तौल समूहमा प्रतिस्पर्धा गर्नेछन् ।