काठमाडौं । नेपाल कम्युनिष्ट पार्टी (एकीकृत समाजवादी)ले सातवटै प्रदेशमा कमिटी पदाधिकारीको टुंगो लगाएको छ ।

पार्टी अध्यक्ष माधवकुमार नेपालले जारी गरेको अन्तरपार्टी निर्देशनमा प्रदेश कमिटीका पदाधिकारीहरूको नामावली पठाइएको हो ।

अन्तरपार्टी निर्देशनमा उल्लेख भए अनुसार प्रदेश १ को इन्चार्जमा घनेन्द्र बस्नेत रहेका छन् । त्यस्तै, सह–इन्चार्ज राजेन्द्रकुमार राई, सुरेश कार्की, उपाध्यक्ष बलदेव चौधरी र राजन राई छन् भने सचिवमा महेश रेग्मी र उपसचिवमा सरिता थापाको नाम उल्लेख गरिएको छ ।

त्यस्तै, प्रदेश २ को इन्चार्जको जिम्मा धर्मनाथप्रसाद साहलाई दिइएको छ । सह–इन्चार्जमा रामप्रित पासवान, रत्नेश्वर गोइत र कल्याणी यादव रहेका छन् भने प्रदेश अध्यक्ष रामचन्द्र यादवलाई तोकिएको छ । सचिवमा लक्ष्मण पौडेलको नाम तोकिएको छ ।

बागमती प्रदेशको इन्चार्ज केदार न्यौपाने छन् भने सह–इन्चार्जहरु जीवनराम श्रेष्ठ र कृष्ण खनाल तोकिएको छ । अध्यक्षमा सावित्रा भुसाल र सचिवमा लक्ष्मण लम्सालको नाम अन्तरपार्टी निर्देशनमा उल्लेख छ ।

गण्डकी प्रदेशको इन्चार्जमा केशवलाल श्रेष्ठको नाम पठाइएको छ । सह–इन्चार्जहरु चुडामणी जंगली र शारदा सुवेदी रहेका छन् । अध्यक्ष तुलबहादुर गुरुङ, उपाध्यक्ष रामजी शर्मा, सचिव प्रतावलाल श्रेष्ठ, उपसचिव श्रीनाथ बराल र उपसचिव रेखा थापा रहेका छन् ।

लुम्बिनी प्रदेशको इन्चार्जमा भावगत विश्वासी, सह–इन्चार्जमा सोमप्रसाद पाण्डे र दलबहादुर सुनार रहेका छन् । त्यस्तै, मेटमणी चौधरीलाई लुम्बिनी प्रदेशको अध्यक्ष बनाइएको छ भने राजु गुरुङलाई सचिव बनाइएको छ ।

कर्णाली प्रदेशको इन्चार्जमा प्रकाश ज्वाला, सह–इन्चार्जमा चन्द्रबहादुर शाही, हंशबहादुर शाही र शेरबहादुर केसीको नाम पठाइएको छ । सचिवमा भने ठगेन्द्रप्रकाश पुरी रहेका छन् ।

सुदूरपश्चिम प्रदेशको इन्चार्जमा गरिमा शाह, सह–इन्चार्जमा प्रेम आले, निरा जैरु, रामकुमार ज्ञवाली, अध्यक्ष बिक्रम शाही र उपाध्यक्षहरू हर्कबहादुर सिंह र शेरबहादुर कुंवर रहेका छन् । त्यस्तै, सुदूरपश्चिम प्रदेशको सचिवमा दिनेशचन्द्र सुवेदी, उपसचिवमा दीर्घ सोडारी, तारा लामा र माया भट्ट रहेका छन् ।

पार्टीका उपमहासचिव जगन्नाथ खतिवडाले प्रदेश र विभिन्न प्रवास कमिटीहरूको नामावली लगभग टुंगो लगाइसकिएको जानकारी दिए ।यद्यपी केही नामहरूमा भने अझै छलफल गर्न बाँकी रहेको उनले बताए । मंगलबारसम्म बाँकी रहेका सबै नामहरू सकेर सार्वजनिक गरिने उनले जानकारी दिए ।