पर्सा, १२ मंसिर । पर्सामा प्रहरीले स्रोत नखुलेको ठूलो रकमसहित एक भारतीय नागरिकलाई नियन्त्रणमा लिएको छ ।

विशेष सूचनाका आधारमा सञ्चालन गरिएको चेकजाँचका क्रममा वीरगञ्ज महानगर–१६ रजतजयन्तीचोकमा प्रहरीले भारत बिहार मोतिहारी, रक्सौलका ५३ वर्षीय सुरेन्द्र साहलाई पक्राउ गरेको हो ।

मधेश प्रदेश ०२–०२५ प ९८०७ नम्बरको मोटरसाइकलमा सवार साहलाई शंका लागेपछि गरेको निरीक्षणमा उनको साथबाट १० लाख फेला परेको प्रहरीले जनाएको छ ।

रकमको स्रोत खुलाउन नसकेपछि प्रहरी टोलीले उनलाई नियन्त्रणमा लिएको पर्सा प्रहरीका प्रवक्ता राजु कार्कीले बताए ।

उनका अनुसार साहलाई आवश्यक कानुनी प्रक्रिया अघि बढाउँदै घटनाबारे थप अनुसन्धान जारी छ ।