जनकपुरधाम, ११ मंसिर । प्रधानमन्त्री सुशीला कार्कीले हालै मुस्लिम समुदायबारे व्यक्त गरेको भनिएको ‘महिलालाई जिउँदै गाडिन्छ’ भन्ने टिप्पणीले देशभर चर्चा र विवाद उत्पन्न गरिरहेकैबेला मुस्लिम नागरिक समाज धनुषाले संयुक्त रूपमा सरकारलाई ध्यानाकर्षण पत्र बुझाएको छ ।

समुदायले उक्त अभिव्यक्ति तथ्यहीन, अपमानजनक र सामाजिक सद्भाव विपरीत रहेको भन्दै प्रधानमन्त्रीलाई तत्काल सार्वजनिक माफी माग्न माग गरिएको छ ।

मुस्लिम नागरिक समाजले धनुषाका प्रमुख जिल्ला अधिकारी प्रेम प्रसाद लुईंटेललाई बुझाएको ध्यानाकर्षण पत्रमा भनिएको छ, ‘प्रधानमन्त्रीको अभिव्यक्ति बहुजातीय, बहुधार्मिक र बहुसांस्कृतिक नेपालको सामाजिक बनोट र संवैधानिक मूल्यविपरीत छ ।’

अभिव्यक्तिले मुस्लिम समुदायको मनोबलमाथि गम्भीर चोट परेको तथा देशको समग्र सामाजिक सद्भावलाई कमजोर पार्ने खालको रहेको उनीहरूको आरोप छ ।

निवेदकहरूका अनुसार यो टिप्पणी धर्म, संस्कृति र समुदायबारे बनेको भ्रम र पूर्वाग्रहलाई संस्थागत रूपमा पुष्टि गर्ने जोखिम बोकेको छ । मुस्लिम अगुवा हकिम राईनले भने, ‘प्रधानमन्त्रीजस्तो संवैधानिक पदधारीबाट यस्ता असम्वेदनशील वचन आउनु अत्यन्त पीडादायक र चिन्ताजनक हो ।’

ध्यानाकर्षण पत्रमा संविधानका विविध धारा उल्लेख गर्दै प्रधानमन्त्रीको अभिव्यक्ति संविधानसम्मत नहुने दाबी गरिएको छ ।

ध्यानाकर्षण पत्रमा भनिएको छ, ‘प्रधानमन्त्रीजस्तो उच्च संवैधानिक पदमा बसेको व्यक्तिबाट यस्तो बयान आउनु नेपाल जस्तो बहुसांस्कृतिक, बहधार्मिक र समावेशी समाजमा अत्यन्त अयोग्य र दुःखद हो ।’ समुदायले प्रधानमन्त्रीको अभिव्यक्तिले मुस्लिम समाजको मनोबलमा गम्भीर चोट पुर्याएको आरोप लगाएको छ ।

पत्रमा संविधानका थुप्रै प्रावधान उल्लेख गर्दै प्रधानमन्त्रीको अभिव्यक्ति देशको कानुनी तथा सहिष्णुता आधारित व्यवस्थासँग मेल नखाने दाबी गरिएको छ ।