जनकपुरधाम, ११ मंसिर । जानकी मन्दिरका उत्तराधिकारी महन्त रामरोशन दासले आफूलाई लक्षित गरी केही सञ्चारमाध्यमले भ्रम फैलाएको आरोप लगाएका छन् ।

आफूले ती पत्रकारलाई रकम नदिएकोले आफूविरुद्ध बदनियतपूर्ण रूपमा भ्रम फैलाउने समाचार प्रकाशित गरेको आरोप लगाएका हुन् । दासले घटनाप्रति आपत्ति जनाउँदै मिडिया काउन्सिलमा आधिकारिक रूपमा उजुरी दिनेसमेत बताए ।

महन्त दासले बिहीबार पत्रकार सम्मेलनको आयोजना गरि मधेश टुडेसँग आवद्ध पत्रकारले सोफासहितका सामग्री खरिदका लागि आफूसँग रकम मागेको र सो रकम दिन अस्वीकार गरेपछि आफूविरुद्ध नियोजित रूपमा अमर्यादित शैलीमा समाचार लेखिएको आरोप लगाएका छन् ।

‘रकम नदिएपछि अन्ट–सन्ट कुरा लेखेर मेरो चरित्रहत्या गर्ने प्रयास भयो,’ दासले भने, ‘पत्रकारिताको मर्यादामाथि हमला हुने यस्तो कार्य संस्थागत रूपमा जाँचबुझ हुनु जरुरी छ ।’

उनले सो अनलाइनमा प्रयोग गरिएका केही शब्दावलीलाई अत्यन्तै भ्रामक र समुदायलाई लक्षित गरी उक्साउने प्रकृतिका रहेको दाबी गरेका छन् ।

समाचारमा आफू बस्ने स्थानको नामसमेत तोडमोड गर्दै अनापसनाप लेखेर भ्रम फैलाउने प्रयास भएको उनको आरोप छ । ‘धार्मिक परिवेशलाई बदनाम पार्ने उद्देश्यले जानी जानी गलत शब्द प्रयोग गरिएको छ,’ उनले भने ।

दासले अब यो विषयलाई मिडिया काउन्सिलमार्फत तथ्यगत छानबिन गर्ने, मिथ्या वा दुराशयपूर्ण सामग्री प्रमाणित भएमा त्यसअनुसार कानुनी कारबाहीको प्रक्रिया अघि बढाउन आग्रह गर्ने बताएका छन् ।

उनका अनुसार आफूले काउन्सिलमा गुहार लगाउनुको उद्देश्य कुनै व्यक्तिलाई दण्डित गराउनेभन्दा पनि मिडियामा बढ्दै गएको अराजकता, असुली प्रवृत्ति र अनियन्त्रित समाचार प्रकाशनलाई रोक्नु हो ।

दासले भने, ‘मलाई व्यक्तिगत प्रतिशोध राखेर लेखिएको गलत सामग्री मात्र नभई भविष्यमा कसैलाई पनि यस किसिमले दुःख नहोस् भन्ने चाहनाले मिडिया काउन्सिलमा पुग्ने निष्कर्ष निकालेको हुँ । सत्यतथ्य खोज होस् र पत्रकारिताको मर्यादा जोगियोस् ।’

पत्रकार सम्मेलनमा धर्मगुरु श्रीनिवासाचार्यले पनि धार्मिक समुदायसहित सबै समूहको अपमान हुने खालका शब्द प्रयोग पत्रकारिताको आधारभूत नियमविपरीत रहेको भन्दै निष्पक्ष छानबिनको माग गरेका छन् ।