सिरहा, ११ मंसिर । सिरहाको गोलबजार नगरपालिका–४ मा बिहीबार तीन सवारीसाधन आपसमा ठोक्किँदा १० जना भन्दा बढी यात्रु घाइते भएका छन् ।

पूर्वपश्चिम राजमार्गको गोलबजार खण्डमा अचानक ब्रेक लागेर पछाडिबाट आएको हाइस र सोही क्रममा दुवैपट्टि भएको सवारीचापका कारण विङ्गरसहित तीनवटा सवारी एकआपसमा ठोक्किएका प्रहरीले जनाएको छ।

प्रहरीका अनुसार दुर्घटनामा कार, यात्रुवाहक हाइस र विङ्गर वान संलग्न थिए । दुर्घटनापछि स्थानीयवासी र प्रहरीको सहयोगमा घाइतेलाई तत्काल उपचारका लागि नजिकैको स्वास्थ्य संस्थामा लगिएको छ।

घाइतेमध्ये केहीको अवस्था मध्यम गम्भीर रहेको बताइएको छ।

दुर्घटनास्थलमा केही समय सडकमै भीडभाड बढेपछि ट्राफिक प्रहरीले बाटो एकतर्फी गरेर आवागमन सहज बनाएको थियो ।

दुर्घटनाको विस्तृत अनुसन्धान थालिएको प्रहरीले जनाएको छ ।