काठमाडौं, १० मंसिर । राष्ट्रिय स्वतन्त्र पार्टी (रास्वपा) ले प्रदेश इञ्चार्जहरूको जिम्मेवारी हेरफेर गर्ने निर्णय गरेको छ ।

पार्टीको सचिवालय बैठकले प्रदेश इञ्चार्जहरूको जिम्मेवारीबाट मुक्त गर्ने निर्णय गरेपछि केन्द्रीय सदस्यहरूबाट नयाँ इञ्चार्ज तोक्ने तयारी गरेको छ ।

सचिवालय बैठकले चुनावी गतिविधिहरूलाई प्राथमिकता दिने उद्देश्यले २१ फागुनमा हुने चुनावलाई मध्यनजर गर्दै प्रदेश इञ्चार्जहरूको भूमिकामा फेरबदल गरेको हो । यसरी जिम्मेवारीबाट मुक्त गरिएका नेताहरूलाई अब चुनाव केन्द्रित कार्यमा सक्रिय बनाइने बताइएको छ ।

पार्टीका सहमहामन्त्री विपीन आचार्यका अनुसार प्रदेश इञ्चार्जहरूको जिम्मेवारी हेरफेर गर्ने निर्णय भनेको चुनाव नजिकिँदै गर्दा रास्वपाले नेतृत्वलाई चुनावी काममा केन्द्रित गराउने उद्देश्य भएको हो ।

पूर्वमा रास्वपाले सातै प्रदेशका इञ्चार्ज तोकेका थिए । कोशीमा सन्तोष परियार, मधेशमा मनीष झा, बागमतीमा लिमा अधिकारी, गण्डकीमा शिशिर खनाल, लुम्बिनीमा विपिन आचार्य, कर्णालीमा गणेश पराजुली र सुदूरपश्चिममा हरि ढकाल रहेका थिए । यद्यपि, कोशी इञ्चार्ज सन्तोष परियार रास्वपा परित्याग गरिसकेका छन् ।

रास्वपा अब प्रदेश इञ्चार्जका लागि नयाँ केन्द्रीय सदस्यहरूलाई जिम्मेवारी दिने तयारीमा छ ।