जनकपुरधाम, ७ मंसिर । मधेश प्रदेशका मुख्यमन्त्री सरोजकुमार यादवले प्रदेशको स्वास्थ्य प्रणाली सुधार्न दीर्घकालीन र व्यावहारिक स्वास्थ्य नीति आवश्यक रहेको बताएका छन् ।

मधेश प्रदेश स्वास्थ्य निर्देशनालयको आयोजनामा जनकपुरधाममा सम्पन्न तीन दिवसीय वार्षिक समीक्षा कार्यक्रममा बोल्दै मुख्यमन्त्री यादवले प्रदेश सरकार स्वास्थ्य नीति निर्माणमा पूर्ण रूपमा सहयोग गर्न तयार रहेको स्पष्ट गरे ।

उनले स्वास्थ्य सेवा सुधारका लागि तीनै तहका सरकारबीच सहकार्य अनिवार्य रहेको उल्लेख गर्दै मधेशमा उत्कृष्ट र नमूनायोग्य स्वास्थ्य कार्यक्रम सञ्चालन गर्ने पालिकाले प्रदेशको स्तर नै उकासेको भन्दै सम्मानित पालिकालाई बधाई दिएका हुन् ।

कार्यक्रममा मधेश प्रदेशका स्वास्थ्य निर्देशक सरोजचन्द्र न्यौपानेको अध्यक्षता थियो । प्रदेशभरका १३६ पालिकामध्ये उत्कृष्ट स्वास्थ्य कार्यक्रम सञ्चालन गरेर पहिलो स्थान हासिल गर्ने सर्लाहीको लालबन्दी नगरपालिकाका नगरप्रमुख, प्रमुख प्रशासकीय अधिकृत र स्वास्थ्य शाखा प्रमुखलाई मुख्यमन्त्रीले दोसल्ला र सम्मानपत्र प्रदान गरे ।

दोस्रो स्थान सर्लाहीकै हरिपुर नगरपालिकाले प्राप्त गर्यो भने तेस्रो स्थान सर्लाहीकै विष्णुपुर गाउँपालिका भयो । प्रादेशिक अस्पतालतर्फ गौर अस्पताल प्रथम, जलेश्वर अस्पताल दोस्रो र सिरहा अस्पताल तेस्रो स्थानमा रहे ।

स्वास्थ्य कार्यालयको समग्र मूल्याङ्कनमा पर्सा प्रथम, सर्लाही द्वितीय र महोत्तरी तृतीय स्थानमा परे । आयुर्वेद सेवातर्फ पर्सा प्रथम, बारा द्वितीय र महोत्तरी तृतीय घोषित गरियो ।

संस्थागत अस्पताल श्रेणीमा बर्दिबास अस्पताल प्रथम भएकै घोषणा कार्यक्रममा गरिएको थियो । पुरस्कृत सबै व्यक्तित्व तथा संस्थालाई मुख्यमन्त्री यादवले दोसल्ला ओढाएर सम्मानपत्र प्रदान गरेका थिए ।

कार्यक्रममा स्वास्थ्य क्षेत्रका विज्ञ, दातृ निकायका प्रतिनिधि, विभिन्न अस्पताल तथा स्वास्थ्य संस्थाका प्रमुखहरूको उल्लेख्य सहभागिता रहेको थियो ।