जनकपुरधाम, ५ मंसिर । मधेश प्रदेशका मुख्यमन्त्री सरोजकुमार यादवले प्रदेशको स्वास्थ्य सूचकाङ्क सुधार गर्न स्वास्थ्यकर्मीहरूको इमान्दार, जिम्मेवार र परिणाममुखी भूमिकाको आवश्यकता अझै बढेको बताएका छन् ।

मधेश प्रदेश स्वास्थ्य निर्देशनालयले जनकपुरधाममा सुरु गरेको तीनदिने वार्षिक समीक्षा कार्यक्रम उद्घाटन गर्दै मुख्यमन्त्री यादवले संरचनात्मक विकास मात्रै सुधारको आधार नभएको स्पष्ट पारे ।

मुख्यमन्त्री यादवले प्रदेश खाद्य सुरक्षाका हिसाबले सक्षम देखिए पनि पाँच वर्ष मुनिका बालबालिकामध्ये कुपोषण निकै उच्च हुनु दुःखद वास्तविकता भएको बताए । ‘खाद्यान्न उत्पादनमा समृद्ध प्रदेशमा कुपोषित बालबालिका बढ्नु विडम्बना हो,’ उनले भने, ‘सुधारका लागि भौतिक पूर्वाधारभन्दा बढी प्रतिबद्धता, व्यवहार र स्वास्थ्य सेवामा पारदर्शिता आवश्यक छ ।’

उनले स्वास्थ्य क्षेत्रको रूपान्तरण भौतिक निर्माणले मात्र सम्भव नहुने भन्दै प्राथमिकतामा पुनर्विचारको आवश्यकता रहेको उल्लेख गरे । ‘ठूला भवनले मात्र उपचारको गुणस्तर बढाउँदैन, प्रभावकारी सेवा आवश्यक छ । आवश्यक परे साना योजनाको बजेट कटौती गरेर भए पनि स्वास्थ्य सूचकमा प्रत्यक्ष प्रभाव पार्ने क्षेत्रमा लगानी बढाउनु पर्छ,’ मुख्यमन्त्री यादवले जोड दिए ।

यस्तै, जेनजी पुस्ताले उठाइरहेको प्रश्नले सरकारका सबै क्षेत्रलाई सचेत बनाएको भन्दै स्वास्थ्य क्षेत्रमा पनि अब रूपान्तरण आवश्यक रहेको टिप्पणी गरे ।

मधेश प्रदेशका स्वास्थ्य सचिव डा. ओमप्रसाद अर्यालले प्रदेशको समग्र स्वास्थ्य क्षमतामा सुधार ल्याउन यस्ता समीक्षा कार्यक्रमले आगामी वर्षका लागि व्यवहारिक र प्रभावकारी रणनीति बनाउन मद्दत पुर्याउने बताए ।

प्रदेश स्वास्थ्य निर्देशक डा. सरोजचन्द्र न्यौपानेले मधेशमा बढ्दो शीतलहरका जोखिमप्रति सचेत रहन स्वास्थ्य संस्थाहरूलाई निर्देशन दिएका छन् । ‘शीतलहरले सर्वाधिक प्रभावित हुने वर्गका लागि तत्काल सतर्कता र पूर्वतयारी आवश्यक छ,’ उनले भने ।

संयुक्त राष्ट्र संघीय जनसङ्ख्या कोषका मधेश प्रदेश प्रमुख डा. नरेन्द्रकुमार मिश्रले खाद्यान्न उत्पादनमा धनी प्रदेशमा बालकुपोषण र गर्भवती महिलामा रक्तअल्पता उच्च हुनु चिन्ताजनक रहेको उल्लेख गरे । ‘खाद्य समृद्ध प्रदेशमा यस्ता समस्या हुनु नीति तथा कार्यान्वयन दुवै पक्षमा कमजोरीको संकेत हो,’ उनले भने ।

वार्षिक समीक्षा कार्यक्रममा मधेश स्वास्थ्य विज्ञान प्रतिष्ठानअन्तर्गतका प्रादेशिक अस्पताल, शिक्षण संस्थान, स्वास्थ्य कार्यालय, आयुर्वेदिक सेवा, निजी क्षेत्रका स्वास्थ्य संस्थाहरू तथा स्थानीय प्रतिनिधिहरू सहभागी छन् ।

तीन दिनसम्म कार्यक्रममार्फत मधेश प्रदेशको स्वास्थ्य क्षेत्रका प्रमुख चुनौती, उपलब्धि तथा सुधारका मार्गहरूमा विस्तृत बहस हुने स्वास्थ्य निर्देशनालयले जनाएको छ ।