जनकपुरधाम, ५ मंसिर । जनकपुरधामस्थित मोडर्न नेपाल इङ्गिलश मेडियम बोर्डिङ स्कुलमा ‘मिथिलान्चल मिठास, संस्कृतिको पहिचान’ भन्ने मूल नारासहित फुड फेस्टिभल–२०८२ भव्य रुपमा सम्पन्न भएको छ ।

मिथिला सभ्यता, परम्परा र खानपानलाई विद्यार्थीमार्फत पुनर्जीवित गर्दै विद्यालयले आयोजना गरेको यो कार्यक्रमले विद्यालय वातावरणलाई सांस्कृतिक उत्सव जस्तै रंगीन बनाएको छ ।

विद्यालय परिसरमै आयोजना गरिएको कार्यक्रमलाई १ देखि १० कक्षा सम्मका विद्यार्थीहरूलाई पाँच समूह मिथिलान्चल स्वाद, मिथिला भोजन, मधुर मिथिला, अन्नपूर्ण किचेन हाउस र संस्कृति भोजनालयमा विभाजन गरेर सञ्चालन गरिएको थियो । प्रत्येक समूहले मिथिलाको ऐतिहासिक, सांस्कृतिक तथा धार्मिक पृष्ठभूमिलाई झल्काउने मौलिक व्यञ्जन तयार गरी प्रस्तुति गरेका थिए ।

स्टलहरूमा विभिन्न परिकार तरकारी, माछा–भात, खिरका विविध प्रकार, तरुवा, देशी परिकार लगायत मिथिलाको मूल पहिचान झल्काउने व्यञ्जन राखिए । खानासँगै विद्यार्थीहरूले स्टलहरूलाई माटोका कलाका सामग्री, मिथिला चित्रकलाका आकृति, धार्मिक प्रतीक, फुलमालाबाट सजावट गरेर परम्परागत सौन्दर्य झल्काएका थिए ।

कार्यक्रम अवलोकनका लागि जानकी मन्दिरका उत्तराधिकारी महन्थ रामरोसशन दास तथा जनकपुरधाम उपमहानगरपालिका शिक्षा शाखा अधिकृत अञ्जु पाण्डे विशेष अतिथिको रुपमा उपस्थित थिए । उनीहरूले विद्यार्थीहरूले प्रस्तुत गरेको सिर्जनाशीलता, परम्पराप्रतिको लगाव र सांस्कृतिक उत्साहको प्रशंसा गर्दै यस्तो अभ्यासले बालबालिकामा आत्मविश्वास, व्यवस्थापन क्षमता र व्यावहारिक सीप दुवैलाई मजबुत बनाउने बताए ।

महन्थ दासले भने, ‘मिथिलाको पहिचान परम्परा र परिकारकै माध्यमबाट जोगिन्छ । विद्यालयले शिक्षासँगै संस्कृतिलाई जोड्ने प्रयास प्रशंसनीय छ ।’ त्यस्तै, शिक्षा शाखा अधिकृत पाण्डेले विद्यार्थीहरूको समूहगत सहकार्य र प्रस्तुतिप्रतिको समर्पणलाई प्रशंसा गर्दै यस्तो कार्यक्रमले सिकाइलाई नविन, प्रभावकारी र जीवनमुखी बनाउने बताइन् ।

विद्यालय सञ्चालक दिपक ठाकुरका अनुसार विद्यार्थी, शिक्षक तथा अभिभावकको उल्लेखनीय उपस्थितिका बीच सम्पन्न फुड फेस्टिभलले विद्यार्थीहरूमा प्रतिस्पर्धा, सिर्जनशीलता र सांस्कृतिक गर्वपूर्ण भावना उजागर गरेको छ । कार्यक्रमले विद्यार्थीहरूलाई आफ्नो पहिचानप्रति गर्व गर्न सिकाउनुका साथै व्यवहारिक सिकाइको उत्कृष्ट उदाहरण बनेको उनको भनाइ छ ।

विद्यालयले उत्कृष्ट व्यवस्थापन, स्वाद, प्रस्तुति र सांस्कृतिक अभिव्यक्तिका आधारमा विभिन्न समूह तथा विद्यार्थीहरूलाई सम्मान तथा प्रोत्साहन प्रदान गर्ने घोषणा गरेको छ । मोडर्न नेपाल बोर्डिङ स्कुलले स्थानीय संस्कृति प्रवद्र्धन र विद्यार्थीको समग्र विकासमा आफू निरन्तर प्रतिबद्ध रहेको जनाएको छ ।